धनगढी – कैलालीको बर्दगोरीया गाउँपालिका वडा– १ बौनियाँ बजारको एक बिद्युतीय सामान रहेको गोदाममा आगो लागेको छ। स्थानीय प्रकाश साउँदको बिद्युतिय सामान रहेको गोदाममा आगो लागेको इलाका प्रहरी कार्यालय बौनियाँका प्रहरी निरीक्षक धुर्ब बिष्टले जानकारी दिए।
शुक्रबार दिउँसो २ बजे तिर लागेको आगो अझै नियन्त्रणमा आउन सकेको छैन्। झण्डै १० वटा सटर रहेको पंखा, फ्रिज, कुलरलगायतका बिद्युतिय सामान रहेको गोदाममा एक्कासी आगो लागेको खबर पछि इलाका प्रहरी कार्यालय सुख्खड, लम्कीलगायत आसपास क्षेत्रबाट ठुलो संख्यामा प्रहरीसहित स्थानीय आगो निभाउन खटिरहेको प्रहरी निरिक्षक बिष्टले बताए।
आगो धेरै फैलिसकेकाले अझै नियन्त्रण गर्न केही समय लाग्ने बिष्टले जानकारी दिए। दमकलसहित ठुलो संख्यामा प्रहरी र स्थानीयले आगो नियन्त्रणको प्रयास गरिरहेका छन्। आगो नियन्त्रणमा आइनसकेकाले कसरी आगो लाग्यो र के कति क्षती भयो भन्ने अहिले भन्न नसकिने प्रहरी निरीक्षक बिष्टले बताए।
प्रकाशित: Dec 31, 2017| 18:23 आइतबार, पुस १६, २०७४