ललितपुर - संस्कृतिविद् वाङ्मय शताब्दी पुरुष सत्यमोहन जोशीसँग चिनियाँ राजदुत होउ यान्छीले भेटघाट गरेकी छन्। शुक्रबार ललितपुरको बखुम्बहालस्थित जोशी निवासमै पुगेर उनले भेटघाट गरेकी हुन्। १०० वर्र्षे जीवनयात्रामा रहेका जोशी र चिनियाँ राजदूतबीच झन्डै ४५ मिनेट भलाकुसारी भएको थियो।
भेटका क्रममा राजदूत होउले जोशीको सुस्वास्थ्य एवं दीर्घजीवनको कामनासमेत व्यक्त गरिन्। भेटका क्रममा जोशीले अरनिकोका बारेमा आफूले लेखेका कृतिहरु, अरनिको, नेपाल र चीनबीचको सम्बन्धका बारेमा चिनियाँ राजदूतलाई जानकारीसमेत गराए। जोशीले चिनियाँ साहित्यमा आफूले गरेका अध्ययन–अनुसन्धानबारे पनि बताएका थिए।
राजदूत यान्छीले चिनियाँ राजदूतले जोशीलाई चीन भ्रमणका लागि प्रस्तावसमेत गरेकी थिइन्। जोशीले आफ्नो स्वास्थ्य र उमेरका कारण भ्रमणका लागि असमर्थ रहेको कुरा व्यक्त गरे। भेटका क्रममा राजदूत होउले जोशीलाई दीर्घजीवन र सुस्वास्थ्यको कामना गर्दै मायाको चिनो प्रदान गरिन्। यससँगै ललितपुर महानगरपालिकाका तर्फबाट मेयर चिरीबाबु महर्जनले मन्छिन्द्रनाथको रथ प्रदान गरे।
जोशीसँगको भेटमा ललितपुर महानगरपालिकाका मेयर चिरीबाबु महर्जन, प्रवक्ता राजु महर्जन, ललितपुर महानगर वडा नं. ३ का अध्यक्ष श्रीगोपाल महर्जन, उद्योग वाणिज्य संघ ललितपुरका पूर्वअध्यक्ष अजरमान जोशीसमेतको उपस्थिति थियो।
प्रकाशित: Dec 31, 2017| 18:23 आइतबार, पुस १६, २०७४