काठमाडौंं– नेपाली कांग्रेसका वरिष्ठ नेता रामचन्द्र पौडेल समूहले पार्टीको वडा अधिवेशन सुरु हुनु अगावै सो समूहबाट केन्द्रीय सभापतिका लागि साझा उमेदवार तय गर्ने भएको छ। पौडेल पक्षका सभापतिका आकांक्षीहरुले सोमबार भएको छलफलमा वडा अधिवेशन अगावै सभापतिको साझा उमेदवार तय गर्ने सहमति गरेका हुन्।
‘सभापतिका आकांक्षीसहित हामी छलफलमा जुटेका थियौं। वडा अधिवेशनअघि नै साझा उम्मेदवार तय गर्ने सहमति जुटेको छ,’ छलफलमा सहभागी एक नेताले भने।
नेता बलबहादुर केसीले साझा उमेदवार तय गर्नका लागि निरन्तर छलफल गर्ने सहमति भएको बताए।
काठमाडौंको बत्तीसपुतलीस्थित अनुपम फुडल्यान्डमा भएको छलफलमा वरिष्ठ नेता पौडेलसहित महामन्त्री डा शशांक कोइराला, नेताहरु प्रकाशमान सिंह, अर्जुननरसिंह केसी, डा रामशरण महत, बलबहादुर केसी, सुजाता कोइराला, डा. शेखर कोइराला लगायतका नेता सहभागी थिए ।
नेता बलबहादुर केसीले साझा उमेदवार तय गर्नका लागि निरन्तर छलफल गर्ने सहमति भएको बताए। बैठकमा सरकार सरकार सञ्चालन र मन्त्रिपरिषद् विस्तारका विषयमा पनि छलफल भएको थियो। शक्ति सन्तुलन मिलाएर मन्त्रालय बाँडफाँड गर्नका लागि प्रधानमन्त्री शेरबहादुर देउवासँग छलफल गर्ने जिम्मा रामचन्द्र पौडेललाई दिइएको छ।