'पत्रकारिताको आचरण कायम होस्'

काठमाडौं – समाजवादी पार्टी, नेपालले पार्टीका कार्यकर्तालाई संयमित रहन आग्रह गरेको छ। गत आइतबार राति एक राष्ट्रिय टेलिभिजनमा पार्टीका अध्यक्ष तथा उपप्रधान एवं स्वास्थ्य तथा जनसंख्यामन्त्री उपेन्द्र यादवलाई मानमर्दन एवं अपमानित हुने ढंगले एक टेलिभिजनमा प्रश्न सोधिएको भन्दै पार्टीले उक्त घटनामा संयमता अपनाउन पार्टीका कार्यकर्तालाई आग्रह गरेको हो। 

पार्टीका उपमहासचिव प्रकाश अधिकारीद्वारा सार्वजनिक विज्ञप्तिमा लाइभ अन्तर्वार्ताका क्रममा पत्रकारले आचारसंहिताविपरीत प्रश्न सोधेको र अभद्र व्यवहार गरेको जनाइएको छ । 

समाजवादी पार्टी, नेपालले प्रेस स्वतन्त्रता र मर्यादालाई सधैँ सम्मान गर्दै आएको बताउँदै विज्ञप्तिमा पत्रकारिताको आचरणविपरीतका प्रवृत्तिलाई निरुत्साहित गर्न र पत्रकारिता जगतलाई अझै सम्मानित एवं मर्या्दित बनाउन संचार गृह, संचारकर्मी र प्रेस काउन्सिलसहित मिडियालाई नियमन गर्ने सम्पूर्ण निकायहरुलाई अपिल गरेको छ। 

सोमबार दिउँसो वीरगञ्जस्थित एभिन्यूज टेलिभिजनको क्षेत्रीय कार्यालयमा समाजवादी पार्टीका कार्यकर्ताले तोडफोड गरेको आरोप उक्त टेलिभिजनले लगाएपछि पार्टीले विज्ञप्ति जारी गरेको हो।