लुम्बिनी प्रदेश सभा अबरुद्ध गर्ने एमाले सांसदहरूको चेतावनी

बुटवल- नेकपा एमाले लुम्बिनी प्रदेश संसदीय दलले आफ्ना माग पूरा नभएसम्म संसद चल्न नदिने चेतावनी दिएको छ। एमालेले कारबाही गरेका दुई जना सांसद अजय शाही र बिमला वलीलाई प्रदेशसभा सदस्यबाट पदमुक्त गर्न माग गर्दै आएको छ। तर, सभामुख पूर्ण बहादुर घर्तिले सासद् शाही स्वतन्त्र भएको र वलीले नेकपा माओवादी रोजेको भन्दै पदमुक्त गर्न नसकिने बताएका  छन्।

त्यसपछि एमाले सांसदहरू र सभामुखबीचको विवाद बढ्दै गएको छ। लुम्बिनी सरकारको सोमबार दिउसो १ बजे प्रदेशसभा बैठक बस्ने कार्यसूची छ। 

तर, एमाले संसदीय दलले भने आफ्नो माग पूरा नभएसम्म संसद् अबरुद्ध गर्ने सभामुखलाई जानकारी गराएको छ। एमाले संसदीय दलका प्रमुख सचेतक भूमिश्वर ढकालले शाही र वलीलाई पदमुक्त गरेको सूचना सभामुखले नपढे संसद अवरुद्ध गराउने जानकारी दिएका हुन्।

प्रतिपक्षी दल मालेले निरन्तर अवरोध गरेपछि मंगलबार र बुधबार संसद् बैठक स्थगित भएको  थियो।