पिएसजीको जितमा नेयमारको गोल

एजेन्सी- १० खेलाडीमा समेटिएको पेरिस सेन्ट जर्मेन (पीएसजी)ले लिग वानमा एङ्गर्सलाई पराजित गरेको छ । शनिबार राती भएको खेलमा पीएसजीले एङ्गर्सलाई २-१ गोल अन्तरले पराजित गरेको हो । 

पीएसजीको जितका लागि नेयमार र एन्जल डि मारियाले एक एक गोल गरे भने एङ्गर्सका लागि फ्लेभियान टेइटले एक गोल फर्काएका थिए । खेलको २० औं मिनेटमा नयमारले गोल गर्दै पीएसजीलाई सुरुवाती अग्रता दिलाएका थिए । पहिलो हाफमा १-० को अग्रता लिएको खेलको दोस्रो हाफमा दुबै टोलीले थप एक एक गोल गरे । 

खेलको ५८ औं मिनेटमा एन्जल डि मारियाले गोल गर्दै पीएसजीलाको अग्रता दोब्बर पारे । खेलको ८५ औं मिनेटमा डिफेन्डर मार्किन्होसले रातो कार्ड खाँदै मैदान बाहिरिएपछि पीएसजी १० खेलाडीमा समेटिएको थियो । 

त्यसको तीन मिनेट पछि फ्लेभियान टेइटले गोल गर्दै एङ्जर्सलाई खेलमा फर्काउने कोशिश गरेपनि थप गोल हुन नसक्दा खेल पीएसजीले २-१ ले जितेको हो । लिगको उपाधि भने पीएसजीले यसअघि नै जिती सकेको छ । 

नेयमारमाथि लागेका तीन खेलको प्रतिबन्ध यसपछिको खेलबाट सुरु हुन छ । नेयमारले अब लिग वानका बाँकी खेल गुमाउने छन । नेयमार र पीएसजीले काराबही फुकुवाका लागि निवेदन समेत दिएका छन् । कारबाहीले नेयमारले सिजनको अन्तिम दुई लिग खेल गुमाउनेछन् । यदी अपिल सफल नभएमा नेयमारले च्याम्पियन्स ट्रफीको खेल समेत गुमाउनेछन् ।