भियतनाममा के गर्दैछन् प्रधानमन्त्री ओली ?

काठमाडौं- साता व्यपापी लामो विदेश भ्रमणमा रहेका प्रधानमन्त्री केपीशर्मा ओली भियतनाममा उच्चस्तरिय भेटवार्तामा व्यस्त भएका छन् । गत बिहीबार भियतनाम गएका प्रधानमन्त्री ओलीले उच्चस्तरीय सरकारी अधिकारी र नेताहरुसंग भेटवार्ता गरेका छन् । 

उनले शनिबार (हिजो) भियतनामका प्रधानमन्त्री न्युगेन सुआन फुक्च, राष्ट्रियसभाका अध्यक्ष न्गुऐन थि किम नागलगायतका उच्च अधिकारीहरुसँग भेट गरेका छन् । प्रधानमन्त्री फुक्चसँगको भेटवार्तापछि शनिबार नै विभिन्न विषयमा १६ बुँदे सम्झौता भएको छ । 

यस्तै प्रधानमन्त्री ओली भियतनामी प्रधानमन्त्री फुकले आयोजना गरेको रात्रिभोजमा सहभागी भएका छन् । उनीसँगै प्रधानमन्त्रीकी धर्मपत्नी राधिका शाक्य, परराष्ट्रमन्त्री प्रदीपकुमार ज्ञवाली, प्रधानमन्त्रीका मुख्य सल्लाहकार विष्णुप्रसाद रिमाल, परराष्ट्र सल्लाहकार डा राजन भट्टराई, सांसद र उच्चपदस्थ सरकारी कर्मचारी पनि सहभागी भएका थिए । 

प्रम ओली र  भियतनामी राष्ट्रियसभाका अध्यक्षबीच भेट

प्रधानमन्त्री ओली र भियतनामको राष्ट्रियसभाका अध्यक्ष न्गुऐन थि किम नागनबीच शनिबार नै संसद् भवनमा भेटवार्ता भएको छ । उनीहरुबीच समसामयीक राजनीतिक, सामाजिक, आर्थिक र दुवै देशको संसदीय मामिला विषयमा छलफल भएको थियो । 

सो अवसरमा प्रधानमन्त्री ओलीले अध्यक्ष नागानलाई गौतमबुद्धको जन्मभूमि लुम्बिनी भ्रमणको निम्तो दिएका थिए । 

प्रधानमन्त्री ओली आज (आइतबार) पनि भियतनाममै विभिन्न भेटवार्ता र अवलोकनमा व्यस्त हुने भएका छन् । उनी भोली (सोमबार) कम्बोडिया प्रस्थान गर्दैछन् । ओली जेठ १ गते बुधबार स्वदेश फर्किने कार्यक्रम छ ।