काठमाडौं - राजधानीको गल्फुटारस्थित न्यु कर्णाली होस्टेलका सञ्चालक जयबहादुर बिक फरार भएपछि अलपत्र परेका १९ बालवालिकालाई प्रहरीले उद्धार गरेको छ। पढाइदिने भन्दै बिभिन्न जिल्लाबाट काठमाडौं ल्याइ होस्टेलमा अलपत्र पारिएको बालबालिहरु रुन थालेपछि स्थानीयले प्रहरीलाई खबर गरेका थिए।
महानगरीय प्रहरी वृत्त महाराजगञ्जको टोलीले सोमबार बिहान न्यू कर्णाली होस्टेलबाट १९ बालबालिकाको उद्धार गरेको डिएसपी फणिन्द्र प्रसाँईले नेपाल समयलाई जानकारी दिए।
दश वर्षसम्म बच्चा पढाइदिने भन्दै विकले बच्चाका परिवारसँग पैसासमेत असुल गरेको र अहिले अलपत्र पारेको पाइएको प्रहरीले जनाएको छ।
डिएसपी प्रसाईँले विकले एक बच्चाको परिवारबाट ५० हजारदेखि एक लाख रुपैयाँसम्म लिएको पाइएको बताए।
होस्टेलका एक कर्मचारीले विकले आफूलाई बच्चा आमाबुवाको जिम्मा लगाइदिनु भनेको र सोही दिनबाट सम्पर्क विहीन भएको प्रहरी समक्ष बयान दिएका छन्।
प्रहरीले बिकले पढाइदिने भन्दै ठगि गरेको र उनकाे खाेजी भइरहेको जानकारी दिएकाे छ।
प्रकाशित: Dec 31, 2017| 18:23 आइतबार, पुस १६, २०७४