मुलुकमा बेरोजगारको संख्या ९ लाख

काठमाडौं – मुलुकमा बेरोजगारीको संख्या ९ लाख ८ हजार रहेको केन्द्रीय तथ्याङ्क विभागले जानकारी दिएको छ। शुक्रबार विभागले सार्वजनिक गरेको तथ्याङ्कमा श्रम शक्ति भित्रको जनसंख्यामध्ये ११ दशमलव ४ अर्थात ९ लाख ८ हजार जनसंख्या बेरोजगार रहेको तथ्य सार्वजनिक भएको हो। 

केन्द्रीय तथ्याङ्क विभागका अनुसार १५ वर्ष वा सो भन्दा बढी उमेर समूहको जनसंख्या २ करोड ७ लाख ४४ हजार रहेको छ । ती मध्ये ७० लाख ८६ हजार जनसंख्या रोजगार रहेका छन्।

तथ्याङ्कअनुसार सबैभन्दा बढी पुरुष ५ लाख ११ हजार बेरोजगार छन् भने महिला ३ लाख ९७ हजार बेरोजगार रहेका छन्।

श्रमशक्तिभन्दा बाहिरको जनसंख्या १ करोड २७ लाख ५० हजार रहेको उल्लेख छ। जसमध्ये पुरुषको संख्या ४२ लाख ५० हजार र महिला ८५ लाख रहेको उल्लेख छ। रोजगारीमा रहेका जनसंख्यामध्ये ६९ प्रतिशत सहरमा र ३१ प्रतिशत ग्रामीण क्षेत्रमा रहेका छन्। रोजगारीमा रहेका पुरुषमध्ये सहरमा ६८ प्रतिशत र ग्रामीणमा ३२ प्रतिशत रहेका छन्। यस्तै, रोजगारीमा रहेका महिलाहरुमध्ये ७० प्रतिशत सहरमा र ३० प्रतिशत ग्रामीण क्षेत्रमा रहेको उल्लेख छ।

यस्तै प्रदेशअनुसार भने सबैभन्दा धेरै प्रदेश २ मा बेरोजगार रहेका छन् भने सबैभन्दा कम प्रदेश ३ मा बेरोजगार रहेका छन्। तथ्यांकअनुसार प्रदेश १ मा १० दशमलव २ प्रतिशत, प्रदेश २ मा २० दशमलव १ प्रतिशत, प्रदेश ३ मा ७ प्रतिशत, गण्डकी प्रदेशमा ९ प्रतिशत, प्रदेश ५ मा ११ दशमलव २ प्रतिशत, कर्णाली प्रदेशमा ९ दशमलव ७ प्रतिशत र सुदूरपश्चिम प्रदेशमा ११ दशमलव ५ प्रतिशत बेरोजगार रहेको तथ्यांकले देखाएको छ।