आजका अखबार : भूमाफियाले बेचिदिए सिंगै बस्ती

काठमाडौं- राजधानीबाट प्रकाशित सोमबारका अधिकांश राष्ट्रिय दैनिक अखबारहरुले श्रीलंकामा शृंखलाबद्ध बम बिस्फोट हुँदा दुई सय भन्दा बढिको मृत्यु भएको विषयलाई मुख्य समाचार बनाएका छन् ।
 
क्रिस्चियन समुदायमाथि लक्षित सुनियोजित विस्फोटबाट ३५ विदेशीसहित २०७ जनाको मृत्यु भएको छ भने साढे चार सय भन्दा धेरै घाइते भएका छन् । आइतबार कोलम्बोका होटल एवम् चर्चसहित आठ ठाउँमा ठूल-ठूला विस्फोट भएका थिए ।

विस्फोटपछि श्रीलंका सरकारले कर्फु लगाएको छ भने सामाजिक संजालमा अस्थायी रुपमा प्रतिवन्ध लगाएको छ । आक्रमण कसले गर्यो भन्ने खुल्ल सकेको छैन भने सुरक्षाकर्मीले आक्रमणको आशंकामा सात जनालाई पक्राउ गरेको पत्र पत्रिकाले लेखेका छन् ।

यसै विषयलाई मुख्य समाचार बनाउँदै कान्तिपुर दैनिकले 'श्रीलंकामा दिनभर विस्फोट' शीर्षकमा खबर लेखेको छ भने अन्नपूर्ण पोस्ट्ले 'श्रीलंकामा शृखलाबद्ध विस्फोट' शीर्षकमा खबर छापेको छ । नागरिक दैनिकमा 'श्रीलंकामा शृखलाबद्ध विस्फोटः २०७ को मृत्यु' शीर्षकमा यो खबर छापिएको छ । नयाँ पत्रिकाले पनि 'श्रीलंकामा शृखलाबद्ध विस्फोटः २०७ को मृत्यु' शीर्षकमै खबर लेखेको छ ।
 
यो विषय बाहेक आजको नयाँ पत्रिकाले सिराहाको मिर्चैया नगरपालिकामा दुई दलितबस्ति भूमाफियाले हडपेको विषयलाई मुख्य समाचार बनाएको छ । जम्मा ६ कट्ठा जग्गामा २८ दलित परिवारः भूमाफियाले बेचिदिए सिंगै बस्ती शीर्षकमा उसले खबर लेखेको छ ।
 
नयाँ पत्रिकामा प्रकाशित खबर अनुसार मिर्चैया नगरपालिका–७ फूलबरियामा जम्मा ६ कट्ठा जग्गामा २८ घरधुरी दलित बस्छन् । उनीहरू यहाँ झन्डै ९० वर्षदेखि बसिरहेका छन् । तर, गत वर्ष स्थानीय जनप्रतिनिधिको मिलेमतोमा उनीहरूको जग्गा अरूले खरिद–बिक्री गरिदिएका छन् ।
 
स्थानीय ६५ वर्षीय घुरन रामका अनुसार सिरहाको कल्याणपुर जब्दीका जग्गाधनी हजारी साहू भनिने रामचन्द्र साहलाई झन्डै ९० वर्षपहिले नै जग्गाको रकम बुझाएर यहाँ बस्ती बसाइएको थियो । उतिवेला जमिनदारले अनेक बहाना बनाएर जग्गा पास गरिदिएनन् ।

अहिले दिवंगत हजारी साहूका नातिहरू श्रवणकुमार साह, दीपनारायण साह, सत्यनारायण साह, रामेश्वर साहलगायतले ९ मंसिर ०७५ मा धनुषाको सबैला नगरपालिका–१२ रघुनाथपुरका जग्गा कारोबारी सुरेशकुमार महतोलाई दलितबस्ती रहेको ६ कट्ठा जमिन बिक्री गरेको स्थानीयले बताए । वडाध्यक्ष रामकुमार यादवले जग्गामा बस्ती तथा बाटोसमेत नरहेको सिफारिस दिएपछि जग्गा बिक्री भएको हो ।

नागरिक दैनिकले भने नेपाल कम्युनिस्ट पार्टीको सचिवालय बैठकले ७७ वटै जिल्ला कमिटीको अध्यक्ष र सचिवको टुंगो लगाएको विषयलाई प्राथमिकताका साथ छापेको छ ।
 
आइतबार साँझ प्रधानमन्त्री निवास बालुवाटारमा बसेको बैठकले जिल्ला कमिटीका अध्यक्ष र सचिवको टुंगो लगाएको नेकपाका प्रवक्ता नारायणकाजी श्रेष्ठले पत्रकारहरुलाई जानकारी दिएका छन् । नेकपाले जिल्ला अध्यक्ष र सचिवको नाम सोमबार सार्वजनिक गर्ने समाचारमा उल्लेख छ।
 
कान्तिपुर दैनिकले भने सरकारले फजुल खर्च भन्दै गत साउनदेखि रोक्का राखेको प्रोत्साहन भत्ता निजामति कर्मचारीलाई फेरि बाड्न थालेको विषयलाई प्राथमिकताका साथ छापेको छ ।

आफ्नै निर्णय उल्टाउँदै सरकारले अख्तियार र भन्सार राजस्वमा १०० प्रतिशत अरु दुई दर्जन कार्यालयमा ५० प्रतिशत प्रोत्साहन भत्ता दिने भएपछि राज्यकोषमा बर्सेनी ६ अर्बको भार थपिएको समाचारमा उल्लेख छ ।