काठमाडौं- नेत्रविक्रम चन्द विप्लव नेतृत्वको समुहले गरेको नेपाल बन्दको आशिंक प्रभाव परेको छ । काठमाडौं उपत्यकामा सामान्य प्रभाव देखिए पनि प्रदेश नम्बर ५ र कर्णली प्रदेशमा बन्दले जनजीवन प्रभावित बनाएको छ।
काठमाडौं उपत्यकामा विहानैदेखि सवारीसाधन चलिरहेका छन् भने बजार र पसल पनि खुलेका छन् । तर, शैक्षिक संस्था भने बन्द भएका छन् । विप्लव समुहले अहिलेसम्म काठमाडौं उपत्यकामा कहि कतै शंकास्पद वस्तु फालेको र सवारी साधनमा आगजनी गरेको छैन् ।
तर, उपत्यका बाहिर ठाउँ ठाउँमा बम भेटिएको छ । राजमार्ग आसपासमा समेत बम भेटिएपछि सवारी साधन चल्न सकेका छैनन् । नवलपरासी, पाल्पा, अर्घाखाची, चितवन, मकवानपुर, मोरङ लगायतका ठाउँमा बम फेला परेका छन् ।
नवलपरासीमा रहेको चौधरी ग्रुपको उद्योगमा समेत बम पड्काएको छ । विप्लव समुहका कार्यकर्ताले नवलपरासीमै आर जे ०२ जिबी २८७० नम्बरको भारतीय ट्रकमा आगजानी गरेका छन् ।
बम र आगजनीका कारण उपत्यका बाहिर फाट्ट फुट्ट बाहेक सवारी साधन चल्न सकेका छैनन् । बजार र पसल पनि बन्द रहेको हाम्रा संवाददाताहरुले जनाएका छन् । शैक्षिक संस्था र कलकारखाना पनि चल्न नसकेको जनाइएको छ ।
सरकारले प्रतिबन्ध लगाएपछि आक्रामक बनेको विप्लव समुहले चैत २५ गते एक विज्ञप्ति जारी गर्दै नेपाल बन्दको घोषणा गरेको थियो । उसले आफूहरुमाथि लगाइएको प्रतिबन्ध नहटाए आन्दोलन चर्काउने र सरकारका कार्यक्रम बिथोल्ने रणनीति अवलम्बन गरेको छ ।
प्रकाशित: Dec 31, 2017| 18:23 आइतबार, पुस १६, २०७४