बैतडीमा पहिरोले बगायो दुई घर

बैतडी- अविरल वर्षापछि आएको पहिरोले बैतडीको पाटन नगरपालिका-१०मा दुई घर बगाएको छ। बिहीवार रातको समयमा  वर्षासँगै आएको पहिरोले हर्क बहादुर कुँवर र हिक्मत कुँवरको घर बगाएको वडा अध्यक्ष देवेन्द्र कुँवरले जानकारी दिए। 

वडाध्यक्ष कुँवरका अनुसार पहिरोले घरसँगै गोठमा रहेका चौपाया र खाद्यान्नसमेत पुरिएको छ। हर्कका तीन वटा भैंसी, एउटा गाई, दर्जन बढी कुखुरा, कपडा र खाद्यान्न पहिरोले पुरिएको अध्यक्ष देवेन्द्रले बताए। हर्ककै दुई लाख नगद र दुई तोला सुन समेत पहिरोमा पुरिएको वडाध्यक्ष देवेन्द्रको भनाइ छ। 

यस्तै हिक्मतका एउटा गाई, ६ वटा बाख्रा, दर्जनभन्दा बढी कुखुरासहित खाद्यान्न पुरिएको छ। पहिरोका कारण मानवीय क्षति नभए वडाध्यक्ष देवेन्द्रले जानकारी दिए। घर पुरिएपछि दुई परिवार विस्थापित भएका छन्।