काठमाडौं- ट्रिटन कलेज कलेज क्रिकेट लिग (सीसीएल)को फाइनलमा प्रवेश गरेको छ । शनिबार कीर्तिपुरसस्थित टीयू क्रिकेट मैदानमा भएको सेमिफाइनल खेलमा हिमालय कलेजलाई ८ विकेटले पराजित गर्दै ट्रिटन फाइनलमा प्रवेश गरेको हो ।
वर्षाका कारण पाँच ओभरमा छोट्याइएको खेलमा टस जितेर पहिले फिल्डिङ रोजेको ट्रिटनले हिमालयलाई चार विकेटको क्षतिमा २३ रनमै रोकेको थियो । जवाफमा ट्रिटनले ३ दशमलव ३ ओभरमा २६ रन बनायो ।
हिमालयले आक्रमक ब्याट्सम्यान विनोद भण्डारी र आदिल खानलाई पेभिलियन फर्काएपनि प्रदिप ऐरि र अरुण ऐरिले सहन जित दिलाए । अरुणले ११ बलमा दुई चौका प्रहार गर्दै १४ रन बनाए । म्यान अफ द म्याच भएका अरुणले एक विकेट पनि लिएका थिए । प्रदिपले चार रन बनाए । हिमालयका लागि कप्तान रुपेश सिंहले दुई विकेट लिएका थिए ।
त्यसअघि राष्ट्रिय टोलीका स्पिनर ललित नारायण राजवंशीले ट्रिटनलाई पहिलो ओभरमै सफल दिलाएका थिए । अब ट्रिटनले उपाधिका लागि गोलडेन गेटसँग भिड्ने छ । गोल्डेन गेटले काठमाडौं विश्वविद्यालयलाई ७२ रनले पराजित गर्दै फाइनलमा स्थान बनाएको थियो ।
प्रतियोगितामा उपविजेताले १ लाख ११ हजार १ सय ११ रुपैयाँ प्राप्त गर्नेछन् । त्यस्तै म्यान अफ द सिसिजले २५ हजार र प्रतियोगिताको उत्कृष्ट ब्याट्स्म्यान र बलरले जनही १० हजार पुरस्कार प्राप्त गर्नेछन् ।
प्रकाशित: Dec 31, 2017| 18:23 आइतबार, पुस १६, २०७४