प्रदेश २ : सदनमा उठ्यो समाजिक विकास मन्त्रीको राजीनामाको माग

जनकपुरधाम- प्रदेश २ को प्रदेभसभामा सामाजिक विकास मन्त्री नवलकिशोर साहको राजीनामाको माग उठेको छ । प्रदेशभित्र व्यवस्थित रुपमा माध्यमिक शिक्षा परीक्षा (एसइई) सञ्चालन गर्न नसकेको भन्दै मन्त्री साहको राजीनामा माग गरिएको छ ।

बैठक सुरु भएलगत्तै नेपाली कांग्रेसका प्रदेशसभा सदस्य वीरेन्द्रप्रसाद सिंहले एसइई परीक्षापनि शुद्ध ढंगले सञ्चालन गर्न नसक्ने मन्त्रीलाई पदमा बसिरहन नमिल्ने भन्दै नैतिकताको आधारमा राजीनामा दिन माग गरेका छन् ।

एसइई परीक्षा संघीय सरकारले सञ्चालन गरेपनि व्यवस्थापन गर्ने जिम्मा प्रदेश सरकार मातहत रहेको बताउँदै प्रदेशसभा सदस्य सिंहले परीक्षाको व्यवस्थापन गर्न नसक्ने मन्त्री तत्काल पदबाट बाहिरिनुपर्ने जिकिर गरे ।

‘परीक्षा व्यवस्थापन गर्ने जिम्मा प्रदेश सरकारको हो,’ सिंहले भने, ‘प्रदेशभित्र प्रश्नपत्र आइसकेपछि उसले रक्षा गर्न सक्नुपर्दछ । तर यस्तो देखिएको छैन् । भोली हुने परीक्षाको प्रश्नपत्रपनि सुरक्षित हुनेमा शंका छ ।’

आफूलाई परीक्षा सञ्चालन गर्ने अधिकार नरहेको भन्दै उनले गम्भीर गल्तीबाट प्रदेश सरकार र प्रदेशका सम्बन्धि मन्त्री उम्किन नसक्ने बताए । ‘अधिकार नभएपछि अनुगमन गर्न हुँदैनथ्यो, तर परीक्षा केन्द्रमा पुगेर केन्द्राध्यक्षदेखि निरीक्षक धम्क्याउने काम किन भयो ?,’ प्रश्न गर्दै सिंहले भने,‘सबै कुरामा संघीय सरकारलाई मात्र दोष लगाएर उम्किन मिल्दैन । कामै नगर्ने सक्ने मन्त्री पदमा किन बसि रह्नु पर्यो ?’

‘विहिबार सप्तरीबाट प्रश्नपत्र बाहिरिएको छ । समाजिक विकास मन्त्रीपनि सप्तरीकै हुन्,’ सिंहले भने,‘परीक्षा अगाबै प्रश्नपत्र बाहिरिन ठुलो आर्थिक चलखेल भएको हामीलाई शंका लागेको छ ।’

व्यवस्थित तरिकाले परीक्षा सञ्चालन नगरी प्रदेश २ का ७२ हजारभन्दा बढी विद्यार्थीहरुको भविष्यसँग खेलवाड गर्ने सामाजिक विकास मन्त्री साहलाई तत्काल राजीनामा दिनुपर्ने सिंहले दोहराए ।