निर्मला हत्या प्रकरण : डिएसपी जिसी पनि ९ लाख धरौटीमा छुटे

धनगढी – कञ्चनपुरकी निर्मला पन्तको बलात्कारपछि भएको हत्यामा प्रमाण नष्ट र यातना दिएको अभियोग लागेका केन्द्रीय अनुसन्धान ब्यूरो सिआईबीका तत्कालिन डिएसपी अंगुर जिसीलाई पनि धरौटीमा छोड्न आदेश भएको छ।

कञ्चनपुर जिल्ला अदालत कञ्चनपुरका न्यायधीश डा.राजेन्द्रकुमार आचार्यको ईजलासले बुधबार थुनछेक बहस गर्दै जिसीलाई ९ लाख धरौटीमा छोड्न आदेश दिएको हो।

श्रेस्तेदार हरीकृष्ण अवस्थिले जिसीलाई यातना दिएको अभियोगमा पाँच लाख तथा प्रमाण नष्टको अभियोगमा चार लाख धरौटी माग भएको जानकारी दिए। अदालतले तोकेको धरौटी बुझाएर जिसी बुधबार नै हिरासत मुक्त भएका छन्। मुद्दाका ८ अभियुक्त मध्ये तत्कालिन कंचनपुर एसपी डिल्लीसिंह बिष्टसहित सात यसअघिनै धरौटीमा छुटिसकेपछि जिसी पनि अदालत उपस्थित भएका थिए।

निर्मला मृत फेला परेपछि चर्किएको आन्दोलनसंगै प्रहरी प्रधान कार्यालयले सिआईबीका डिएसपी जिसीको नेतृत्वमा घटनाको अनुसन्धान गर्नका लागि १३ साउनदेखि टोली कञ्चनपुर पुगेको थियो। आइतबार मात्रै आदालतले कञ्चनपुरका तत्कालिन प्रहरी प्रमुख डिल्लीराज विष्टलाई साढे दश लाख धरौटीमा रिहा गर्न आदेश दिएको थियो। एसपी विष्टसहित सो प्रकरणका सात जना धरौटीमा रिहा भइसकेका छन्।