काठमाडौं – नेपाली कांग्रेसको मंगलबारको बैठक पनि आन्तरिक कचिंगलमा अल्झिएको छ। पार्टीका आन्तरिक विषयमा छलफल भइरहे पनि विवाद् टुंगिएको छैन।
यसअघिका बैठकमा निर्वाचन समिति गठन, विधान मस्यौदा निर्माणका लागि समिति गठन, नेविसंघलगायतका विषयमा छलफल भए पनि सहमति जुट्न सकेन। कांग्रेस केन्द्रीय सदस्य मिन विश्वकर्माका अनुसार लामो समयदेखि पार्टीका विभिन्न विभाग गठन हुन नसक्दा पार्टीले प्रभावकारी रुपमा काम गर्न सकेको छैन।
मगलबार दिउँसो दुई बजे बसेको बैठकमा सहमति जुट्न नसकेका विषयमा छलफल हुने विश्वकर्माले बताए।
लामो समयको रस्साकस्सीपछि कांग्रेसले मंगलबार केन्द्रीय सदस्य भीष्मराज आङदम्बेको संयोजकत्वमा पार्टीको केन्द्रीय अनुशासन समिति गठन गरेको छ।
पाँच सदस्य रहने अनुशासन समितिको सदस्यमा हाल केन्द्रीय सदस्यद्वय देवेन्द्रराज कँडेल र किशोरसिंह राठौर रहेका छन्। बाँकी दुई सदस्य वरिष्ठ नेता रामचन्द्र पौडेल पक्षले नाम दिएपछि पूर्णता दिइने बताइएको छ।
यसअघि गत फागुन १४ गते बोलाइएको बैठक सभापति शेरबहादुर देउवा र वरिष्ठ नेता पौडेल पक्षबीच अनुशासन समिति गठनमा सहमति हुन नसक्दा बैठक बस्दै नबसी स्थगित गरिएको थियो। सोमबार पनि केन्द्रीय समिति बैठक बस्नुअघि दुवै पक्षबीच पदाधिकारीस्तरमा समिति गठन सम्बन्धमा सहमतिको प्रयास गरिएको थियो।
प्रकाशित: Dec 31, 2017| 18:23 आइतबार, पुस १६, २०७४