काठमाडौं- अखिल नेपाल फुटबल संघ (एन्फा)को हरेक गतिविधि अब डिजिटल प्रविधिमा राखिने भएको छ । शुक्रबार प्रविधिसँग सम्वन्धित दुई कम्पनी इम्प्रुभमेन्ट कम्पनी नेपाल (आईसीएन) र मेर्सी क्रप्ससँग सम्झौता गर्दै एन्फाका हरेक गतिविधि डिजिटल प्रविधिका राखिने भएको हो ।
एन्फाले फुटबलका हरेक गतिविधिलाई प्रविधिसँग जोड्न सम्झौता गरेको हो । एन्फा अध्यक्ष कर्मा छिरिङ शेर्पा, आईसीएन सीईओ रुपेश भक्त श्रेष्ठ र मेर्सीका कन्ट्री निर्देशक सञ्जयध्वज कार्कीले संयुक्त रुपमा सम्झौतापत्रमा हस्ताक्षर गरे ।
अब नेपाली फुटबलका हरेक गतिविधि र तथ्यांक सफ्टवेयरको सहायतामा गरिने छ । सम्झौता अनुसार फुटबल गतिविधिको तथ्यांक राख्न आईसीएनले १० लाख बराबरको सफ्टवेयर तयार पार्ने छ ।
तर, सफ्टवेयर हाललाई एन्फा र सम्बन्धित क्लबले मात्रै प्रयोग गर्न पाउने छन् । एन्फाले फुटबलको सर्वोच्च निकाय फिफा र एसियन फुटबल महासंघ (एएफसी) को नियम अनुसार सफ्टवेयर तयार गरेको छ । उक्त सफ्टवेयरको ५० प्रतिशत खर्च मेर्सीले प्रदान गर्ने छ । उक्त सफ्टवेयर दुई कम्पनिले निर्माण गर्नेछ ।
प्रकाशित: Dec 31, 2017| 18:23 आइतबार, पुस १६, २०७४