काठमाडौं- पूर्वअर्थमन्त्री भरतमोहन अधिकारीको पार्थिव शरीर श्रद्धाञ्जलीका लागि नेकपाको पार्टी कार्यालय धुम्बाराहीमा राखिएकाे छ ।
नेकपाका नेता कृष्णगोपाल श्रेष्ठका अनुसार अधिकारीको पार्थिव शरीर श्रद्धान्जलीका लागि बिहान ९ बजेदेखि १२ बजेसम्म पार्टी कार्यालयमा राखिने छ ।
प्रधानमन्त्री केपी शर्मा ओली र नेकपाका अध्यक्ष पुष्पकमल दाहाल प्रचण्डले पार्टीको झन्डा ओडाएर श्रद्धान्जली व्यक्त गरेका छन् । अन्य शीर्ष नेताहरु समेत श्रद्धान्जली दिएका थिए ।
श्रद्धान्जली कार्यक्रम सकिए पछि आजै अन्त्येष्टि गर्ने पारिवारिक स्रोतले जनाएको छ । यद्यपी अधिकारीको अन्त्येष्टि कसरी गर्ने भन्ने विषयमा निर्णय गर्न मन्त्रिपरिषदको आकस्मिक बैठक बस्दैछ । उच्चस्तरिय स्रोतका अनुसार नेता अधिकारी राष्ट्रिय सम्मान दिने सरकारको तयारी छ ।
नेता अधिकारीको ८२ वर्षको उमेरमा शनिबार राति ९ बजेर ३५ मिनेट जाँदा ह्याम्स अस्पताल काठमाडौंमा निधन भएको थियो । महोत्तरीको भ्रमरपुरा गाउँमा २२ वैशाख १९९३ मा जन्मिएका अधिकारी नेपालको वामपन्थी आन्दोलनको पहिलो पुस्ताका नेता मानिन्छन् ।
२०४७ को संविधानको मस्यौदाकार अधिकारी ०५१ मा बनेको तत्कालीन एमालेको नौ महिने अल्पमतको सरकारमा अर्थमन्त्री बनेका थिए । वृद्धभत्ता वितरण र ‘आफ्नो गाउँ आफैँ बनाऔँ’ लगायतका कार्यक्रम लागू गरेर उनले लोकप्रिय अर्थमन्त्रीको छवि बनाएका थिए ।
उनकै पालामा सुरु भएको सामाजिक सुरक्षा कार्यक्रमले अहिलेसम्म निरन्तरता पाएको छ । दुईपटक उपप्रधानमन्त्री, चारपटक अर्थमन्त्री, एकपटक यातायातमन्त्री बनेका उनी मोरङबाट चारपटक सांसद भएका थिए ।
प्रकाशित: Dec 31, 2017| 18:23 आइतबार, पुस १६, २०७४