अन्ततः फुट्यो एमाले, नयाँ पार्टी दर्ताका लागि आयोगमा आवेदन

सरकारले राजनीतिक दलसम्बन्धी अध्यादेश जारी गरेपछि नेपाल समूहलाई पार्टी फुटाउन सहज भएको हो। सरकारले उक्त समूह र जसपाको महन्थ ठाकुर समूहलाई लक्षित गरेर नै अध्यादेश ल्याउने निर्णय गरेको हो। २० प्रतिशत केन्द्रीय कमिटी सदस्य र सांसद भए पार्टी फुटाउन सकिने व्यवस्था अध्यादेशमा छ।  

नयाँ दलको नाम नेकपा एमाले (समाजवादी) राखिएको र चुनाव चिन्ह खुला किताब मागिएको केन्द्रीय सदस्य जगन्नाथ खतिवडाले जानकारी दिए। नयाँ दलको अध्यक्षमा माधवकुमार नेपाल रहनेछन्। 

प्रतिनिधिसभामा वरिष्ठ नेता नेपाल पक्षमा २२ जना सांसद छन्। साउन ३ गते प्रधानमन्त्री शेरबहादुर देउवालाई एमालेका २२ जना सांसदले विश्वासको मत दिएका थिए।

एमाले केन्द्रीय कमिटीमा भने २०३ सदस्य छन्। अध्यादेशअनुसार नेपालले पार्टी फुटाउन ४१ जना केन्द्रीय सदस्य भए पुग्छ। आफ्नो पक्षमा ५८ जना केन्द्रीय सदस्य रहेको दाबी नेपाल पक्षको छ।