धनगढी उपमहानगरले सबै वडामा अप्टिकल फाइवर बिछ्याउँदै 

धनगढी – धनगढी उपमहानगरपालिकाले नगर क्षेत्रमा अप्टिकल फाइबर बिछ्याउन सुरु गरेको छ। उपमहानगरले सवै १९ वटै वडामा आफ्नै अप्टिकल फाइवर बिच्छ्याउन लागेको हो। मंगलबार उपमहानगरपालिकाका मेयर नृपबहादुर वडले अप्टिकल फाइवर बिछ्याउने कार्यको उद्घाटन गरेका छन्। 

इ–गभर्नेन्स सेवालाई प्रवर्धन गर्न र उप–महानगरपालिकाबाट प्रवाह हुने काम कार्वाहीलाई खुला र पारदर्शी बनाउनका लागि आफ्नै अप्टिकल फाइवर बिछ्याउन सुरु गरिएको नगर प्रमुख वडले बताए। ‘कुनै पनि नगर स्मार्ट हुनका लागि सूचना प्रविधिको विकास आवश्यक हुन्छ’ वडले भने, ‘उपमहानगरपालिकाबाट दिने सेवालाई बिस्तारै पेपरलेस बनाउँदै लग्ने छौँ।’ 

फागुन मसान्तसम्म सबै वडामा अप्टिकल जडान गर्ने काम पुरा हुने सफ्टवेयर इन्जिनियर हरीप्रसाद भट्टले जानकारी दिए। जसमा प्राविधिक साझेदारी न्यू आइटी भेन्चरले गरिरहेको छ।

१९ वटै वडामा अप्टिकल फाइवर बिछ्याउन ८५ लाखको स्टीमेट रहेको छ। पहिलो चरणमा उपमहानगरपालिकाका सबै वडा कार्यालय, स्वास्थ्य, भेटेनरीमा पुर्‍याउने योजना रहेको मेयर वडले बताए। उपमहानगरले सबै सामुदायिक विद्यालयमा समेत उक्त सेवा पुर्‍याउने लक्ष्य राखेको जनाएको छ। उपमहानगरले योजनाहरुको अनुगमन, मुल्यांक र सुझाव समेत दिन सकिने गरी हाम्रो धनगढी एप्स समेत संचालनमा ल्याएको छ।