नेकपा कार्यदलको बैठक : बादलको प्रतिवेदन पारित होला त आज ?

काठमाडौं - एकीकरण प्रक्रियालाई टुंगो लगाउन नेकपा स्थायी समितिले गठन गरेको कार्यदलको बैठक आज पनि बस्ने भएको छ। बैठक शुक्रबार २ बजेका लागि बोलाइएको छ।

कार्यदलको बिहीबारको बैठकमा संयोजकसमेत रहेका रामबहादुर थापा बादलले तीन पृष्ठ लामो प्रतिवेदन सदस्यहरुलाई वितरण गरेका थिए। त्यसपछि बैठकमा विवाद लम्बिएको थियो। प्रतिवेदन हातमा परेपछि सदस्यहरूले यो कसको प्रतिवेदन भन्दै बैठकमा आपत्ति जनाएका थिए। त्यसपछि यसलाई अध्ययन गर्न समय चाहियो भन्दै बादल र महासचिव विष्णु पौडेलबाहेक सबैले समय मागेका थिए।

स्रोतका अनुसार शुक्रबारको बैठकमा बहुमत सदस्यले थापाको प्रतिवेदनप्रति असहमति जनाउँदै फरक प्रतिवेदन बुझाउने तयारी गरेका छन्।

स्रोतका अनुसार अध्यक्षद्वयसँग परामर्श गरेर बादलले यो प्रतिवेदन कार्यदलमा लगेका हुन्। बैठकमा सदस्यहरुले कार्यदल असफल भएको प्रतिवेदन नबुझाउने अडान लिएपछि शुक्रबार फेरि बैठक बस्‍ने गरी स्थगित भएको थियो।

नेतृत्वले माइनस गरेको भन्दै बिहीबार सदस्यहरुबीच विवाद भएपछि कुनै निष्कर्ष निस्किएन। नेकपा संसदीय दलको कार्यालय सिंहदरबारमा बसेको पार्टी एकता कार्यदलको बैठकमा सदस्यहरूले नेतृत्व तानाशाही हुन खोजेको, स्थायी समितिलाई सचिवालय र सचिवालयलाई अध्यक्षद्वय केपी ओली र प्रचण्डले सञ्चालन गर्न खोजेको आरोपपछि डेढ घन्टा छलफलमा जुटेको कार्यदलको बैठक बिनानिष्कर्ष सकिएको थियो।