काठमाडौं- नेपाल तरुण दलले प्रधानमन्त्री केपी शर्मा ओली नेतृत्वको सरकार नसच्चिए कुर्सीबाट तानेरै भएपनि सडकमा ल्याउने चेतावनी दिएको छ।
नेपाल तरुण दल केन्द्रीय समितिको आयोजना र मोरङ जिल्ला समितिको संयोजनमा प्रदेश १ को विराटनगरमा आयोजित विरोध कार्यक्रममा बोल्दै नेपाल तरुण दलका अध्यक्ष जितजंग बस्नेतले ओली सरकारको रवैया यही रहने हो भने सरकारलाई कुर्सीबाट तानेर सडकमा ल्याउने चेतावनी दिएका हुन्।
उनले भने, 'दुई तिहाइको दम्भले फुलेको ओली सरकारले जनता विरोधी कामहरु तत्काल सच्चयाउनु पर्दछ। नसच्याए जनताको हितका लागि कुर्सीबाट तानेर सडकमा ल्याउन हामी बाध्य हुनेछौं।'
त्यसैगरी तरुणका महासचिव भुपेन्द्र जंग शाहीले ओली सरकार धर्म बेचेर खरिद गरेको होली वाइन खाएर फुलेको आरोप लगाएका छन्। उनले भने, 'सरकारलाई भ्रष्टाचार गरेर पुगेन, ३३ किलो सुन पचाएर पुगेन र अन्तिममा धर्म बेचेर किनेको होली वाइन खाएर मोटायो। अहिले तरुणको आन्दोलन देखेर स्वीट्जरल्यान्ड उड्नुभयो।'
कम्युनिस्ट सरकारको चमत्कार, महँगी, बलात्कार र भ्रष्टाचारका विरुद्ध तरुणले सात वटै प्रदेशमा विरोध कार्यक्रम गर्ने भएको छ। मंगलबार प्रदेश एक विरोध कार्यक्रम गरेको तरुणले बुधबार प्रदेश २ मा गर्ने भएको छ। कार्यक्रममा केन्द्रीय अध्यक्ष जितजंग बस्नेत, उपाध्यक्ष उत्तम चापागाईं, महासचिव भुपेन्द्र जंग शाहीलगायतका १४ वटै जिल्लाका हजारौंको तरुणको सहभागीता थियो।
तस्बिर सौजन्य : दिनेश विक्रम शाहप्रकाशित: Dec 31, 2017| 18:23 आइतबार, पुस १६, २०७४