पर्सा– अख्तियार दुरुपयोग अनुसन्धान आयोगले नारायणी अस्पताल वीरगन्जमा छापा मारेको छ। अस्पतालको औषधि पसलमा एक करोडभन्दा बढी हिनामिना भएको खबरका आधारमा हेटौंडास्थित अख्तियारको टोलीले सोमबार छापा मारेको हो।
फार्मेसीको स्टक, म्याद गुज्रेको औषधीको विवरण, खरिद तथा बिक्री सम्बन्धित कागजातहरु नियन्त्रणमा लिएर छानविन थालेको आयोगका सूचना अधिकारी विष्णु सापकोटाले बताए। विभिन्न व्यक्तिहरुबाट ‘फार्मेसीको अनियमितता विरुद्ध उजुरी परेपछि अख्तियारको टोलीले छापा मारेको हो।
अस्पतालले गत आर्थिक वर्षमा करिब २१ करोड मूल्य बराबरको उपकरण खरिदको बोलपत्र आह्वान गरेको थियो। सोही खरिद प्रकरण र फार्मेसीमा औषधी खरिद र विक्रि लगायत सम्बन्धी सम्पूर्ण कागजात नियन्त्रणमा लिई अनुसन्धान थालिएको अख्तियारको टोलिले जनाएको छ।