आजका अखबार : एनजीओका लागि मन्त्रीले कुटे सचिवलाई 

काठमाडौं- राजधानीबाट प्रकाशित सोमबारका राष्ट्रिय दैनिक अखबारहरुले विविध विषयका खबरलाई पहिलो प्राथमिकतामा पारेका छन् । 

कसैले प्रदेश नम्बर २ का मन्त्रीले सचिव कुटेको विषयलाई मुख्य समाचार बनाएका छ भने कसैले चिनीको मूल्य बढाउन चलखेल भएको विषयलाई प्राथमिकतामा पारेका छन् । 

आजको नयाँ पत्रिकाले प्रदेश सभामुखकै अगाडि मन्त्रीबाट कुटिए सचिव शीर्षकमा मुख्य समाचार छापेको छ। अन्नपूर्ण पोस्ट्ले उद्दण्ड मन्त्रीः प्रदेश २ मा सभामुखको कार्यकक्षमै कुटिए सचिव शीर्षकमा खबर छापेको छ । नागरिक दैनिकले भने यो विषयलाई एङ्कर न्यूज बनाएको छ ।  

देश २ का आर्थिक मामिला तथा योजना मन्त्री विजयकुमार यादवले उद्योग वन, पर्यटन तथा वातावरण मन्त्रालयका सचिव विद्यानाथ झामाथि कुटपीट गरेका हुन् । संघीय सरकारले सशर्त अनुदानअन्तर्गतको गरिबी निवारणका उद्यम कार्यक्रमका लागि आफ्नो एनजीओलाई छनौट नगरेको भन्दै मन्त्री यादवले सचिव झालाई कुटेको पत्रपत्रिकाले लेखेका छन् ।   

यो विषय बाहेक आजको नयाँ पत्रिकाले छाया मन्त्रीका दाबेदार शीर्षकमा मुख्य समाचार छापेको छ। कांग्रेस संसदीय दलले मागेअनुसार आवेदन दिने क्रम जारी रहेको समाचारमा जनाइएको छ ।  

अन्नपूर्ण पोस्ट्ले भने भारतद्वारा पानी र क्षतिपूर्ति दिन इन्कार शीर्षकको खबरलाई प्राथमिकताका साथ छापेको छ। शुक्रबार भएको नेपाल भारत जलस्रोत बैठकमा भारतले क्षतिपूर्ति दिन अस्विकार गरेको समाचारमा उल्लेख छ । भारतले कोसी, गण्डक र महाकालीमा एकलौछटी संरचना बनाएको थियो । 

आजको कान्तिपुर दैनिकले भने चिनी मूल्य बढाउन चलखेल शीर्षकमा मुख्य समाचार छापेको छ ।

उद्योगी व्यवसायीहरु चिनीको लागत मूल्य ७८ पुर्याउन लविङ गर्न थालेका छन् । यो माग पुरा भएमा उपभोक्ताले प्रतिकेजी चिनीको मूल्य १०० रुपैयाँ तिर्नु पर्ने छ । उनीहरुले यो मूल्य कार्यान्व्यनका लागि योजना आयोग, अर्थ, उद्योग र कृषि मन्त्रालयमा विवरण बुझाइसकेका छन् ।

आजको कारोबार दैनिकले पनि चिनीमा ८ रुपैयाँसम्म मूल्यवृद्धि प्रस्ताव शीर्षकमा मुख्य समाचार छापेको छ ।

नागरिक दैनिकले भने विदेशमा प्रतिवन्धित औषधी नेपालमा विक्रि हुने गरेको विषय र तिब्बतीलाई सघाउने अमेरिकी सिनेटको निर्णयलाई मुख्य समाचार बनाएको छ । यस्तै जलविद्युत आयोजना निर्माणमा स्थानीय सरकार बाधक शीर्षकको खबरलाई पनि प्राथमिकाताका साथ छापेको छ ।