काठमाडौं- एमसिसिको विरोध गर्ने क्रममा स्वतन्त्र उन्नत लोकतन्त्र पार्टी र स्वतन्त्र राष्ट्रिय अभियान नेपाल नामक दुई संस्थाको अगुवाइमा एमसिसी परियोजनाअन्तर्गत रातमाटे विद्युत् सबस्टेसन निर्माण गर्नका लागि अधिग्रहण गरिएको जग्गामा झण्डा गाडेर कब्जामा लिएको घोषणा गरेका छन्।
समाचारहरुमा एक खालको सूचना प्रवाह भएको भए पनि कुनै ठूलो उथलपुथल र विरोधको अवस्था नभएको नुवाकोट जिल्लाका प्रमुख जिल्ला अधिकारी जीवनप्रसाद दुलालले नेपाल समयलाई बताए।
‘सो जग्गा नेपाल विद्युत प्राधिकरणको आयोजनाको लागि वर्षौंअघि अधिग्रहण भएर प्राधिकरणको नाममा आइसकेको जग्गा हो,’ प्रजिअ दुलालले भने, ‘सो जग्गाको मुआब्जा लगायत केही समस्या छैन। सबै मुद्दाहरु सम्बोधन भइसकेको अवस्था हो।’
उनले हाल सो जग्गा बाँझो र खाली भएको र केही समूहले कार्यक्रम गरेको बताए। ‘हामीलाई आएको जानकारीअनुसार काठमाडौंबाट केही समूहले एमसिसिको सम्बन्धमा कार्यक्रम गर्न आएको र सो खाली जग्गाामा कार्यत्रम गरेर फर्किएको भन्ने रिर्पोट छ,’ दुलालले भने, ‘हाल आयोजनाको काम केही नभएको र ठाउँ खाली भएकाले अरुले कार्यक्रम गरेर गएको बुझिएको छ। भोलिको दिनमा केही समस्या भए प्राधिकरणले खबर गर्ला।’
उता एमसिए नेपाल विकास समितिले भने जग्गा कब्जाको विषयमा ध्यानाकर्षण भएको बताएको छ। एमसिए नेपालले आफ्नो विज्ञप्तीमा विरोध गर्ने संस्थाको नाम भने उल्लेख गरेका छैन। एमसिए नेपालले उक्त सब–स्टेसनका लागि आवश्यक ३ सय ९८ रोपनी जग्गा अधिग्रहण नेपालको जग्गा प्राप्ति, ऐन २०३४ अनुसार भएको जनाएको छ।
सो स्थानमा भविष्यमा नेपाल विद्युत् प्राधिकरणले बनाउने सब–स्टेसन पनि रहने गरी निर्माण कार्य गरिनेछ।