कोहलपुर – हाम्रो पूर्णिमा साहित्य प्रतिष्ठान कोहलपुरले हरेक वर्ष प्रदान गर्दै आएको पूर्णिमा साहित्य रत्न–२०७४ यस वर्ष बरिष्ठ आख्यानकार नयन राज पाण्डेलाई प्रदान गर्ने निर्णय गरेको छ।
२०६९ सालमा स्थापित दुई लाख अक्षय कोषको उक्त पुरस्कारबाट प्रतिष्ठानले हरेक वर्ष ११ हजार एक रुपैयाँ सहित नेपाली कला, साहित्यमा महत्वपूर्ण योगदान पुर्याउने एक जनालाई सम्मान गर्दै आएको छ। पाण्डेका उलार, लु, घामकिरी, सल्लीपिर, चक्लेट जस्ता चर्चित साहित्यिक कृतिहरु प्रकाशित भएका छन्।
यस पुरस्कारबाट हालसम्म वरिष्ट गायक तथा गीतकार प्रेमप्रकाश मल्ल, वरिष्ट कथाकार सनत रेग्मी, वरिष्ट कवि तथा गीतकार दिनेश अधिकारी एवम् वरिष्ट कथाकार महेश बिक्रम शाह सम्मानित भइसकेका छन्।
पुस २८ गते साहित्यिक समारोहकाबीच पाण्डेयलाई सम्मान गरिने प्रतिष्ठानका अध्यक्ष महानन्द ढकालले बताए। आख्यानकार एल बि क्षेत्रीको आख्यान ‘कप्तान १९९८’ को गृह विमोचन गरिने अध्यक्ष ढकालले बताए।
प्रकाशित: Dec 31, 2017| 18:23 आइतबार, पुस १६, २०७४