काठमाडौं-निर्मला हत्या प्रकरणमा पक्राउ परेका कञ्चनपुरका प्रदीप रावल सामान्य तारेखमा रिहा भएका छन् । घटनामा दोषी कबुल गराइएका रावललाई बुधबार जिल्ला प्रशासन कार्यालय काठमाडौंले रिहा गरेको हो ।
गत मंसिर १८ गते मंगलबार पक्राउ परेका उनलाई तीन हप्तापछि अदालतले रिहा गरेको हो ।
रावल पक्राउ परेपछि निर्मला हत्याको अनुसन्धान साँघुरिँदै गएको प्रहरीले दाबी गरेपनि अहिले प्रमाण नपुगेर रावललाई रिहा गरेपछि निर्मला हत्या प्रकरण अझै जटिल बन्दै गएको छ ।
स्थानीय वर्कसर्पमा काम गर्ने रावललाई साउन १० गते कुखुरा चोरेको आरोपमा प्रहरीले पक्राउ गरेको थियो । कञ्चनपुर प्रहरीले पक्राउ गरेर छाडेका रावललाई चार महिनापछि अनुसन्धानमा खटिएको प्रहरीको टोलीले काठमाडौंबाट पक्राउ गरेको थियो ।
रावललाई आफन्तको सहयोगमा काठमाडौंमा बोलाएर पक्राउ गरिएको थियो ।
प्रहरी हिरासतमा रहेका उनले अपराध स्वीकार गरेको प्रहरीले दाबी गरेको थियो । रावल पक्राउ परेपछि नेपाल प्रहरी प्रमुख आइजिपी सवेन्द्र खनालले राति १० बजेदेखि बिहान साढे दुई बजेसम्म आफैंले बयान लिएका थिए ।
उनीसँग पक्राउ परेका विशाल चौधरी १८ दिनपछि रिहा भएका थिए । उनले प्रहरीले दिएको याताना खप्न नसकेर अपराध स्वीकार गरेको बताएका थिए ।
यसअघि प्रहरीले पक्राउ गरेका दिलीपसिंह विष्टको डिएनए परिक्षण गर्दा नमिलेपछि उनलाई पनि छाड्नुपरेको थियो ।
प्रहरीले अभियुक्त दाबी गरेका व्यक्तिहरु प्रमाण नपुगेर लगातार छुट्न थालेपछि निर्मला हत्या प्रकरणको अनुसन्धान कमजोर र थप संकास्पद बन्दै गएको छ ।
प्रकाशित: Dec 31, 2017| 18:23 आइतबार, पुस १६, २०७४