एजेन्सी- कप्तान लियोनेल मेस्सीको ह्याट्रिकको मद्दतले बार्सिलोना स्पेनिस ला लिगा फुटबल लिगको शीर्षस्थानमा यथावत रहेको छ । आइतबार राति भएको खेलमा मेस्सीको ह्याट्रिकसँगै बार्सिलोनाले लेभान्टेलाई ५-० को फराकिलो गोल अन्तरले पराजित गरेको हो ।
बर्सिलोनाको जितका लागि मेस्सीले ह्याट्रिक पुरा गर्दा लुइस स्वारेज र जेरार्ड पिकेले समान १-१ गोल गरे । ला लिगामा मेस्सीको यो ३१ औं ह्याट्रिक हो । बार्सिलोनाले खेलको ३५औं मिनेटमा लुइस स्वारेजको गोलबाट अग्रता बनाएको थियो ।
खेल सकिन २ मिनेट बाँकी रहदा मेस्सीले गोल गरेपछि बार्सिलोनाले पहिलो हाफमा अग्रता दोब्बर गरेको थियो । दोस्रो हाफ सुरु भएको २ मिनेट नबित्दै मेस्सीले व्यक्तिगत दोस्रो गोल गर्दै बार्सिलोनाको अग्रता तेब्बर पारे ।
६०औं मिनेटमा मेस्सीले ह्याट्रिक पुरा गर्दा बार्सिलोनालाई खेलमा ४-० को बलियो पकड बनाए । ८८औं मिनेटमा डिफेन्डर जेरार्ड पिकेले गोल गर्दै बार्सिलोनालाई ५-० को फराकिलो जित दिलाए । यस जितसँगै बार्सिलोनाको १६ खेलबाट ३४ अंक पुगेको छ ।
सेभिल्ला र एट्लेटिकोको समान खेलबाटै ३१ अंक रहँदा रियल मड्रिड २९ अंक जोडेर चौथो स्थानमा रहेको छ । आइतबार राति नै भएको खेलमा सेभिल्लाले जिरोनालाई २-० ले पराजित गर्दै लिगको दोस्रो स्थानमा उक्लन सफल भएको थियो । सेभिल्लाको जितमा इभर बनेगा र पाब्लो सारावियाले गोल गरे ।
प्रकाशित: Dec 31, 2017| 18:23 आइतबार, पुस १६, २०७४