जनकपुरधाम- २८ मंसिरमा हुने नेपाल ईन्जिनियर्स एशोसिएसनको निर्वाचनमा दुई समूह भिड्दै छन्। केन्द्रीय तथा प्रादेशिक नेतृत्व चयन गर्न एशोसिएसनको निर्वाचन हुन लागेको निर्वाचनमा लोकतान्त्रिक र प्रगतिशील समर्थक ईन्जिनियरहरु चुनावी मैदानमा होमिएका छन्। एशोसिएसनको प्रादेशिक निर्वाचन पहिलो पटक हुँदै छ।
एशोसिएसनको ३२ औं कार्यकारिणी निर्वाचनमा लोकतान्त्रिक समूहबाट केन्द्रीय अध्यक्ष पदका लागि प्राध्यापक ईन्जिनियर हिरेन्द्रमान प्रधानले उम्मेदवारी दिएका छन्। काठमाण्डौं निवासी प्रधान विगत तीन दशकदेखि प्राध्यापन क्षेत्रमा लागेका व्यक्ति हुन्। यसैगरी प्रगतिशील समूहबाट केन्द्रीय अध्यक्ष पदका लागि प्राध्यापक डा त्रिरत्न बज्राचार्य चुनावी मैदानमा छन्।
यता प्रदेश २ को अध्यक्ष पदमा लोकतान्त्रिक समूहबाट सभापतिमा मनोजकुमार दास, उपसभापतिमा दिलिपकुमार श्रीवास्तव, सचिवमा अजितकुमार यादव, सहसचिवमा भवेश मिश्र र कोषाध्यक्षमा किशोर यादवको उम्मेदवारी परेको छ।
यसैगरी प्रगतिशील समूहबाट प्रदेश २ को सभापतिका लागि नन्दकिशोर यादव, उपसभापतिमा रामबाबु प्रसाद, सचिवमा नुर होदा आलम, सहसचिवमा विजयकुमार महतो थारु र कोषाध्यक्ष पदका लागि श्याम नारायण चौधरीले उम्मेदवारी दिएका छन्।
निर्वाचन समितिले सोमबार अन्तिम सूचि प्रकाशन गरे लगत्तै उम्मेदवारहरु चुनावी प्रचारलाई तिव्रता दिएका छन्।
प्रकाशित: Dec 31, 2017| 18:23 आइतबार, पुस १६, २०७४