बालोन डि’ओरमा विश्व विजेताको कदर हुनु पर्छ : एमबाप्पे

एजेन्सी- यस पटकको बालोन डि’ओरमा पनि लियोनल मेस्सी र क्रिस्टियानो रोनाल्डोको दबदबा रहेका बेला फ्रान्स तथा पेरिस सेन्ट जर्मन (पिएसजी)का युवा स्टार खेलाडी केलियन एमबाप्पेले भने फरक अभिव्यक्ती दिएका छन् । 

तर, मेस्सी र रोनाल्डोको दशक लामो दबदबा यसपटक तोडिने कतिपयले अनुमान गरि रहेका बेला एमबाप्पेले यस पटकको बालोन डि’ओर फ्रान्सका कुनै एक खेलाडीले जित्नु पर्ने बताएका हुन् । 

विश्वकपमा युवा खेलाडीको उपाधि जितेका १९ वर्षीय एमबाप्पेले आफुले बालोन डि’ओर नजित्दा पनि कुनै फरक नपर्ने बताएका छन् । ‘यो अवार्डका लागि दाबेदार धेरै छन् । मलाई लाग्छ विजेता फ्रेन्च हुनेछन् । किनकी यो अवार्डमा विश्वकप विजेताको कदर हुनु पर्ने छ ।’ 

एमबाप्पेले भने, ‘तर पनि अवार्डका लागि तीव्र प्रतिस्पर्धा हुनेछ । त्यसैले यसपटकको यो अवार्ड यसले नै जित्छ भन्ने अनुमान लगाउन गार्हो छ ।’ फ्रान्सले रुस विश्वकप २०१८ मा क्रोएसियालाई पराजित गर्दै विश्वकप जितेको थियो । 

विश्व कपका गोल्डेन बल विजेता क्रोएसियाका लुका मोड्रिचले फिफा बेस्ट अवार्ड पनि जितेका थिए । तर, एमबाप्पे फ्रान्सेली सुपर स्टार भन्दा मोड्रिच बालोन डि’ओरको हकदार नभएको बताएका छन् । बालोन डि’ओर अवार्डको विजेता पेरिसमा डिसेम्बर ३ मा घोषणा गरिनेछ ।