जनकपुरधाम-सशस्त्र प्रहरीले धनुषाबाट ट्रयाक्टरसहित डेढ क्विन्टलभन्दा बढी अवैध सुर्ती नियन्त्रणमा लिएको छ ।
भारतबाट नेपालतर्फ आउँदै गरेको अवस्थामा सशस्त्र प्रहरीले धनुषाको हंसपुर नगरपालिका–३ हंसपुर चोकबाट ट्रयाक्टरसहित १ हजार ६ सय २० केजी सुर्ती नियन्त्रणमा लिएको हो ।
ज १ त ६४०५ नम्बरको ट्रयाक्टरमा भारतबाट अवैध रुपमा नेपाल भित्र्याइएका ६ लाख ६० हजार ९६० रुपैयाँ मूल्य बराबरको सुर्ती सशस्त्र प्रहरीले नियन्त्रणमा लिएको सीमा सुरक्षा बल जनकपुरका डीएसपी मोहन क्षेत्रीले जानकारी दिएका छन् ।
यसैगरी सोहि ट्रयाक्टरमा बोरामा पोका पारिएको अवस्थामा जाडोमा प्रयोग हुने ४३ हजार २ सय मूल्य बराबरको थर्मकोट दुई सय सोह्र जोड, ५० हजार मूल्य बराबरको उनीको कुर्ता सुरुवाल ८८ थान लगायतका सामग्री बरामद भएको सशस्त्र प्रहरीले जनाएको छ ।
ट्रयाक्टरसहित नियन्त्रणमा लिइएका सामान जनकपुर भन्सार कार्यालयमा बुझाइएको प्रहरीले जनाएको छ ।
प्रकाशित: Dec 31, 2017| 18:23 आइतबार, पुस १६, २०७४