काठमाडौं– एभरेस्ट प्रिमियर लिग (ईपीएल) को फ्रेन्चाइज क्लब भैरहवा ग्लाडिएटर्सले श्रीलंकाका खेलाडी दिनेश चान्डिमललाई भित्र्याएको छ।
भैरहवाले आज बिहीबार सूचना जारी गर्दै विश्वकप च्याम्पियन दिनेशलाई भित्र्याएको जानकारी दिएको हो।
विकेटकिपर र ब्याट्स्मेन दिनेश श्रीलंकाको टी २० आईको कप्तानी गर्ने सर्वाधिक कम उमेरका खेलाडी हुन्। सन् २०१३ मा बंगलादेशविरुद्ध दिनेशले सर्वाधिक कम उमेरमा कप्तानको रुपमा डेब्यू गरेका थिए। सन् २०१४ मा विश्वकपको उपाधि श्रीलंकाले जित्दा दिनेश राष्ट्रिय टिमका सदस्य थिए।
चान्डिमलले श्रीलंकाबाट ६२ टेस्ट, १ सय ४९ ओडिआई र ५७ टि२० आई खेल खेलेका छन् । टि२० आईमा चान्डिमलले ५ अर्धशतक सहित कुल ८ सय ६८ रन जोडेका छन्। चान्डिमलले राजस्थान रोयल्सबाट आर्इपिएल खेलिसकेका छन्। ३१ वर्षिय विकेटकिपर ब्याट्सम्यान चान्डिमल श्रीलंका वर्तमान टोलीका प्रमुख ब्याट्सम्यान हुन् ।
चान्डिमलले श्रीलंका टेस्ट, ओडिआई र टि२० तीनै शैलीमा कप्तानी गरेका छन्। यता भैरहवाले प्रशिक्षकका रुपमा पुवुदु दसानायकेलाई नै निरन्तरता दिने बताएको छ। पुवुदूले नेपाली राष्ट्रिय क्रिकेट टिम पनि सम्हालिसकेका छन्।
चौथो संस्करणको ईपीएल आउँदो असोजमा कीर्तिपुरस्थित त्रिवीको क्रिकेट मैदानमा हुँदैछ। ईपीएलमा विभिन्न सहरका ६ टिमको सहभागिता रहन्छ।