नेकपाको सचिवालय बैठक बस्दै : यस्ता छन् एजेण्डा

काठमाडौं- पार्टी भित्र बढ्दै गएको असन्तुष्टि र पार्टी एकताको विषयमा छलफल गर्न सत्तारुढ दल नेपाल कम्युनिस्ट पार्टी (नेकपा)को सचिवालय बैठक बुधबार बस्दै छ ।

 प्रधानमन्त्री निवास बालुवाटारमा दिउँसो ३ बजे बस्ने बैठकमा पार्टी एकतालाई तल्लो तहसम्म पुर्याउने र शीर्ष नेताहरुमा देखिएको असन्तुष्टि हल गर्ने विषयमा छलफल हुने जनाइएको छ । पार्टी एकीकरण, जनसंगठनहरूको एकीकरणलाई टुङ्गो लगाउने गरि छलफल गरिने एक नेताले जनाकारी दिए । 

यसअघि सोमबारको बैठकमा नेकपाले आन्तरिक एकता कमजोर हुँदा विपक्षीले फाइदा उठाएको निष्कर्ष निकालेको थियो । नेकपा सचिवालयले छठसम्म तल्ला समितिको एकता टुंग्याउने गरि तयारी थालेको छ । माथिल्लो तहमा पार्टी एकता भएको ५ महिना बितिसक्दा समेत नेकपाका तल्ला समिति र जनसंगठन बेग्लाबेग्लै छन्।

यस्तै बुधबारको बैठकमा सरकारको काम कारबाहीका विषयमा पनि समिक्षा हुने भएको छ । सरकारले सोचेअनुरुपको काम नसकेको आरोप लागिरहेका बेला सरकारको गम्भिर समिक्षा गर्न लागिएको हो । स्रोतका अनुसार प्रधानमन्त्री केपीशर्मा ओली मन्त्रीहरु प्रिवर्तन गरेर सरकार नयाँ ढङ्गले चलाउने मनस्थितीमा पुगेका छन् । केही मन्त्रीको विषयमा पनि चर्चा सुरु भएको छ ।