सुर्खेत- स्थानीय युवालाई कुटेर विवादमा तानिएका जुनीचाँदे गाउँपालिका–२ का वडा अध्यक्ष रामबहादुर नेपाली धरौटीमा छुटेका छन्। जिल्ला प्रशासन कार्यालय जाजरकोटले वडाध्यक्ष नेपालीलाई ५ हजार धरौटीमा छोड्ने गर्ने निर्णय गरेको हो।
स्थानीय सर्पे दमाईलाई डोरीले बाँधेर निर्घात कुटपिट गरेको घटना सामाजिक सञ्जालमा भाइरल भएपछि वडाध्यक्ष नेपालीलाई प्रहरीले पक्राउ गरेको थियो। भिडियोका आधारमा जिल्ला प्रहरी कार्यालय जाजरकोटले अभद्र व्यवहार सम्बन्धी मुद्दा चलाइएको थियो।
पीडितको बयानका आधारमा ५ हजार रुपैयाँ धरौटीमा छोडिएको जिल्ला प्रशासन कार्यालय जाजरकोटले जानकारी दिएको छ। ‘भिडियोको आधारमा अभद्र व्यवहार व्यवहारसम्बन्धी मुद्दा चलाइएको थियो। तर पीडितले नै वडाध्यक्षको गल्ती नभएको बयान दिए,’प्रमुख जिल्ला अधिकारी प्रेमप्रसाद देवकोटाले भने, ‘गलत नियत नभेटिएपछि ५ हजार धरौटीमा छोडिएको छ।’ उनका अनुसार वडाध्यक्ष नेपालीलाई भदौ १६ गते बकपत्र गर्न आउने शर्तमा धरौटीमा छोडिएको हो।
साउन १५ गते मदिरा खाएर हो–हल्ला गरेको भन्दै वडाध्यक्ष नेपालीले स्थानीय युवा सर्पेलाई डोरीले बाँधेर सार्वजनिक स्थलमा कुटपिट गरेका थिए। घटना भएको तीन दिनपछि साउन १९ गते घटना बाहिरिएको थियो।
सेवाग्राहीलाई अपमानजनक रुपमा कुटपिट गरेको भन्दै वडाध्यक्षको चौतर्फी विरोध भएको थियो। साउन २१ गते प्रहरीले वडाध्यक्ष नेपालीलाई पक्राउ गरेको थियो।
वडाध्यक्ष पक्राउ परेपछि स्थानीयले विरोध प्रदर्शनसमेत गरेका थिए। त्यस्तै पीडित सर्पेले बरु आफू जेल बस्न तयार हुने तर वडाध्यक्षलाई थुन्न नपाइने भन्दै बयान दिएका थिए।