काठमाडौं- आईसीसी टी-२० विश्वकप एसिया छनोट अन्तर्गत नेपालले लगातार आफ्नो चौथो खेलमा जित निकालेको छ । आफ्नो चौथो खेलमा भुटानलाई एक सय १७ रनले पराजित गर्दै लगातार जित निकालेको हो ।
नेपालले दिएको १५१ रनको लक्ष्य पछ्याएको भुटानले १६.४ ओभरमा सबै विकेट गुमाउदै मात्र ३३ रन बनाउन सक्यो । भुटानका लागि कुनै पनि ब्याट्सम्यान खुलेर खेल्न सकेनन् ।
नेपाली बलिङ सामु निरहि देखिएका भुटानी ब्याट्सम्यान मध्य टेन्जिङ वाङचुङले सर्वाधिक ११ रान जोड्न बाहेक अन्य ब्याट्सम्यानले दोहोरो अंक छुन सकेन । त्यस्तै संजिवन गुरुङले ६ रन जोड्दा रन्जुङ मिक्यो दोर्जीले ५ र रमेस लिम्बुले ४ रन जोडे ।
नेपालका लागि सन्दिप लामिछाने र ललित राजवंशीले समान तीन तीन विकेट लिए । त्यस्तै बसन्त रेग्मीले दुई तथा दिपेन्द्र सिंह ऐर र शरद भेषवाकरले समान एक एक विकेट लिएका थिए ।
राजवंशीले चार ओभरमा दुई मेडिन राख्दै चार रन खर्चे र तीन विकेट लिएका थिए भने सन्दिपले समान चार ओभरमा नै दुई मेडिन राख्दै ६ रन खर्चे र तीन विकेट लिएका थिए ।
यसअघि नेपालले निर्धारित २० ओभरमा चार विकेट गुमाएर १५० रन जोडेको थियो । नेपालका लागि प्रदीप ऐरीको अर्धशतकिय पारि खेलेका थिए । उनले ६८ बल खेल्दै चार चौका र दुई छक्काको मद्दतमा ७५ रन जोडे ।
नेपालका लागि अनिल कुमार साहले २७ रन जोड्दा दिपेन्द्र सिंह ऐरीले १५ र आरिफ सेखले १३ रन जोडे । त्यस्तै करन केसी ११ रनका अविजित रहे । भुटानका लागि थिन्ले जम्टसो, संजिवन गुरुङ, जिग्मे सिंग्य र रमेस लिम्बुले समान एक एक विकेट लिएका थिए । छनोटमा नेपाल ४ खेलबाट ८ अंक जोडेर शीर्ष स्थानमा छ ।
प्रकाशित: Dec 31, 2017| 18:23 आइतबार, पुस १६, २०७४