ओल्ड ट्राफोर्ड (एजेन्सी)- गत राति भएको इंग्लिस प्रिमियर लिगमा न्युक्यासल युनाइटेडलाई पराजित गर्दै म्यानचेस्टर युनाईटेडले रोमाञ्चक जित निकालेको छ । दुई गोलले पछि परेको स्थितिलाई उल्ट्याएर युनाइटेडले न्युक्यासलमाथि रोमाञ्चक जित निकालेको हो ।
यस जितसँगै पराजित भएको खण्डमा बर्खास्त हुने भनिएका जोसे मोउरिन्होको जागिर पनि केहि हदसम्म लम्बिएको छ । घरेलु मैदान ओल्ड ट्राफोर्डमा भएको खेलमा युनाइटेडले ३-२ गोल अन्तरले रोमाञ्चक जित निकालेको हो । युनाइटेडको जितमा हुवान माटा, एन्टोनी मार्सियल र एलेक्सिस साञ्चेजले गोल गरे । न्युक्यासलबाट केनेडी र योसीनोरी मुटोले गोल गरे ।
युनाइटेड शुरुवाती १० मिनेटमा नै २-० ले पछि परेको थियो । सातौ मिनेटमा केनेडी र १०औं मिनेटमा योसीनोरीले गोल गरेपछि युनाइटेड शुरुवातमै २-० ले पछि परेको थियो । त्यसपछि युनाइटेडले उच्च प्रदर्शन गरेपनि गोल गर्नको लागि ७०औं मिनेट कुुर्नु परेको थियो ।
७०औं मिनेटमा हुवान माटाले गोल गर्दै युनाइटेडलाई खेलमा फर्कने संकेत दिए । त्यसको ७ मिनेटपछि एन्टोनी मार्सियलले गोल गरेपछि युनाइटेडले खेललाई २-२ गोलको बराबरीमा ल्याएका थिए । पल पोग्वाको ब्याक हिल पासमा मार्सियलले सहजै गोल गरेका थिए ।
९०औं मिनेटमा वैकल्पिक खेलाडी एलेक्सिस साञ्चेजले गोल गर्दै युनाइटेडलाई ३-२ को रोमाञ्चक जित दिलाए । न्युक्यासलमाथिको जितसँगै युनाइटेड ८ खेलबाट १३ अंक जोडेर आठौं स्थानमा उक्लिएको छ । पराजित न्यु क्यास्टल समान ८ खेलबाट दुई अंक जोडेर पुछारबाट दोस्रो स्थानमा छ ।
प्रकाशित: Dec 31, 2017| 18:23 आइतबार, पुस १६, २०७४