सोमबार, मंसिर २३, २०७६

विदेश

गम्भीर आर्थिक संकटतिर पाकिस्तान

पाकिस्तानी मुद्रा रुपीको अवमूल्यन भएको छ । एक अमेरिकी डलरको मूल्य एक सय १८ रुपी ७० पैसा पुगेको छ । 

गम्भीर आर्थिक संकटतिर पाकिस्तान
इस्लामावाद- पाकिस्तानी मुद्रा रुपीको अवमूल्यन भएको छ । एक अमेरिकी डलरको मूल्य एक सय १८ रुपी ७० पैसा पुगेको छ । 

गत सोमबारको तुलनामा तीन दशमलव आठ प्रतिशतले गिरावट आएको छ । डलरलाई छाडेर भारतीय र पाकिस्तानी मुद्राको तुलना गर्ने हो भने भारतीय ५० पैसा बराबर पाकिस्तानी एक रुपैयाँ पुगेको अर्थविद्हरूले बताएका छन् । एक अमेरिकी डलरको मूल्य ६७ भारतीय रुपैयाँ छ । 

सात महिनायता पाकिस्तानी मुद्राको तीन पटक अवमूल्यन भइसकेको छ । समाचार एजेन्सी रोयटर्सका अनुसार केन्द्रीय बैंक ‘स्टेट बैंक अफ पाकिस्तान’ले मुद्रा सन्तुलनका लागि विभिन्न कार्य सञ्चालन गरे पनि सफल हुन सकेको छैन । लगातार मुद्रा अवमूल्यन हुँदा पाकिस्तानी नागरिक चिन्तित छन् । 

पाकिस्तानमा आगामी २५ मेमा संसदीय निर्वाचन हुँदैछ । चुनावभन्दा पहिले नै देशमा आर्थिक संकट आउने आकलन अर्थविद्हरूको छ । पाकिस्तानी अर्थतन्त्र करिब तीन सय अर्ब अमेरिकी डलरबराबरको छ । 

विदेशी मुद्राको सञ्चितिले पनि पाकिस्तानी अर्थ व्यवस्थालाई कमजोर बनाइरहेको छ । यस्तै अवस्था रहेमा पाकिस्तानले अन्तर्राष्ट्रिय मुद्रा कोष (आईएमएफ)सँग गुहार माग्नुपर्ने अवस्था आउन सक्ने अर्थशास्त्रीहरूको भनाइ छ । 

एक अमेरिकी डलरबराबर ११८.७० पाकिस्तानी रुपी, एक रुपीको भारु ५० पैसा ।


आईएमएफ गुहार्नु परे त्यो पाँच वर्षयताको दोस्रो गुहार हुनेछ । यसअघि सन् २०१३ मा पनि आईएमएफको सहयोगमा पाकिस्तान आर्थिक संकटबाट बाहिर निस्किएको थियो । 

स्टेट बैंक अफ पाकिस्तानले बजारमा उतारचढावका कारण यस्तो अवस्था आएको बताएको छ । नेसनल इन्स्टिच्युट अफ साइन्स एन्ड टेक्नोलोजीका अर्थशास्त्री अस्फाक हसन खानले अन्तरिम सरकार रहँदा यस्तो अवस्था आएको बताउँदै आम निर्वाचनको समयमा अझै नाजुक स्थिति आउने बताए । 

अन्तरिम सरकारले नीतिगत सुधार गर्दै मुद्रा अवमूल्यनको उचित समाधान निकाल्नुपर्ने सुझाव उनले दिएका छन् । यसअघि सरकारको नेतृत्व गरिरहेको पाकिस्तानी मुस्लिम लिग (नवाज)का नेताहरूले भने मुलुकको आर्थिक समृद्धिका लागि फेरि पनि आफ्नै पार्टीलाई सरकारमा पुर्‍याउनुपर्ने प्रचार गर्दै आएका छन् । -बीबीसी
प्रतिक्रिया दिनुहोस्