मंगलबार, कात्तिक २६, २०७६

समाचार

'राजर्षि विश्वविद्यालय तत्काल कार्यान्वयनमा ल्याऊ'

राजर्षि जनक विश्वविद्यालय प्रदेश-२ र जनकपुरका लागि गौरवको विषय रहेकाले यथाशीघ्र कार्यान्वयनमा ल्याउन प्राध्यापकहरूले माग गरेका छन् । 

'राजर्षि विश्वविद्यालय तत्काल कार्यान्वयनमा ल्याऊ'
जनकपुरधाम- राजर्षि जनक विश्वविद्यालय प्रदेश-२ र जनकपुरका लागि गौरवको विषय रहेकाले यथाशीघ्र कार्यान्वयनमा ल्याउन प्राध्यापकहरूले माग गरेका छन् । 

उनीहरूले त्रिभुवन विश्वविद्यालयसरह सेवासुविधा पाउनुपर्ने शर्त पनि अगाडि सारेका छन् । उक्त विश्वविद्यालय स्थापनासम्बन्धि निर्णय चार महिनाअघि नै भइसकेको छ । 

तर, त्यसका लागि आधार मानिएका जनकपुरको रामस्वरूप रामसागर बहुमुखी क्याम्पस तथा राजविराज र सिरहा क्याम्पसका प्राध्यापक र कर्मचारीहरूले सेवा, सुविधा स्पष्ट हुनुपर्ने माग गरेपछि कार्यान्वयनमा आउने सकेको छैन । 

विश्वविद्यालय सञ्चालनमा त्रिविसँग देखिएको असमझदारी तत्काल समाधान गरी पठनपाठन शुरु गराउन विश्वविद्यालयका उपकुलपति भरत झालाई प्राध्यापकहरूले सुझाव दिएका छन् ।

प्राध्यापक डा. रामस्वार्थ रायले त्रिविसँग छलफल गरेर आधार तथा आंगिक क्याम्पसहरूलाई समायोजन गरी तत्काल कार्यान्वयनमा ल्याउन सुझाव दिए । आफ्नै गाउँठाउँमा स्थापना भएको विश्वविद्यालयको सफलताका लागि सबै पक्षको सहयोग आवश्यक रहेको उनको भनाइ थियो ।

प्रदेश २ का मुख्यमन्त्री लालबाबु राउतले उक्त विश्वविद्यालयलाई प्राविधिक शैक्षिक केन्द्रको रूपमा विकास गर्नुपर्ने बताए । 

प्राध्यापक भोगेन्द्र झाले विश्वविद्यालय स्थापना गर्न कांग्रेस उपसभापति विमलेन्द्र निधिले निर्वाह गरेको भूमिका बिर्सन नहुने बताए । विश्वविद्यालय स्थापनाको प्रक्रिया शुरु गर्न २० वर्षअघि नै सम्बन्धित क्याम्पसका प्राध्यापक र कर्मचारीहरूको लिखित सहमति लिइएको जानकारी दिए । पत्रकार महासंघ धनुषाका अध्यक्ष अनिल मिश्रले प्रदेशकै पहिलो विश्वविद्यालयबारे प्रदेश सरकारको नीति तथा कार्यक्रममा स्थान नपाउनु दुःखद रहेको बताए । 

विश्वविद्यालयका उपकुलपति भरत झाले त्रिविसँग छलफल गरेर छिट्टै समायोजन प्रक्रिया अगाडि बढाइने बताए । उनका अनुसार आगामी शैक्षिक सत्रदेखि बीआईटी, बीबीए, बीएस्सी, एमएलटी, एमएचएन र पीजी डिप्लोमा इन हेल्थ एन्ड न्युट्रिसनलगायत विषयको पठनपाठन थाल्ने तयारी भइरहेको छ । 
प्रतिक्रिया दिनुहोस्