बुधबार, कात्तिक २७, २०७६

समाचार

प्रदुषित पानी उत्पादन गरेको भन्दै चार उद्योगमा शिलबन्दी

जनकपुरमा प्रदुषित पानी उत्पादन गरेको भन्दै चारवटा पानी उद्योगमा शिलबन्दी गरिएको छ । 

प्रदुषित पानी उत्पादन गरेको भन्दै चार उद्योगमा शिलबन्दी
जनकपुरधाम- प्रदुषित पानी उत्पादन गरेको भन्दै यहाँका चार वटा उद्योगमा शिलबन्दी गरिएको छ । 

स्थानीय बजार अनुगमन समितिले बिहीबार जनकपुर-१३ स्थित विभा वेभरेज प्रालिले उत्पादन गर्दै आएको भोडा ड्रिङकिङ वाटर र जनकपुर-४ स्थित ग्लोबल एक्वा पानी उद्योगमा शिलबन्दी गरेको हो ।

अनुगमन समितिले यसअघि जनकपुर-९ स्थित जनकनन्दनी ड्रिङकिङ वाटर उद्योग र एभरेस्ट पानी उद्योगमा शिलबन्दी गरेको थियो ।

यी उद्योगहरूको अन्य कागजपत्र दुरुस्त रहे पनि खाद्य तथा गुण नियन्त्रण कार्यालय हेटौंडाबाट अनुज्ञा पत्र नलिएको भन्दै शिल गरिएको हो । 

उद्योग दर्तापछि प्रशोधित पानीलाई ७२ घण्टासम्म ल्याब परीक्षण गराई गुण नियन्त्रण कार्यालयबाट अनुज्ञा पत्र लिनुपर्छ । तर, लामो समयदेखि पानी उत्पादन गर्दै आए पनि अनुज्ञा पत्र नलिएकाले पानी खान योग्य नरहेको ठहर गर्दै शिलबन्दी गरिएको घरेलु तथा साना उद्योग कार्यालयका कर्मचारी जीतेन्द्रप्रसाद सिंहले बताए । 

दुई साताअघि शिलबन्दी गरिएका जनकनन्दनी र एभरेस्ट उद्योगले अझै अनुज्ञापत्र ल्याउन नसकेपछि बन्द अवस्थामा छन् । जिल्ला प्रशासनका अधिकृत दिपेश साह नेतृत्वमा  खाद्य निरीक्षक नवीन देउजा, घरेलु तथा साना उद्योग कार्यालयका सिंहलगायतको टोलीले पानी उद्योगहरूमा अनुगमन गरेको थियो ।
प्रतिक्रिया दिनुहोस्