बुधबार, कात्तिक २७, २०७६

विदेश

तिब्बती भिक्षुहरूलाई समाजवादी तालिम !

चीनको स्वशासित क्षेत्र तिब्बतका बौद्ध भिक्षु र आनीहरूलाई राजनीतिक करिअर अभिवृद्धिका लागि सरकारले तालिम दिन थालेको छ । तालिमप्राप्त भिक्षु र आनीहरूले सरकारी नीतिहरू कार्यान्वयनमा महत्वपूर्ण भूमिका निर्वाह गर्दै आएका छन् । 

तिब्बती भिक्षुहरूलाई समाजवादी तालिम !
बेइजिङ-चीनको स्वशासित क्षेत्र तिब्बतका बौद्ध भिक्षु र आनीहरूलाई राजनीतिक करिअर अभिवृद्धिका लागि सरकारले तालिम दिन थालेको छ । तालिमप्राप्त भिक्षु र आनीहरूले सरकारी नीतिहरू कार्यान्वयनमा महत्वपूर्ण भूमिका निर्वाह गर्दै आएका छन् । 

राजनीतिक गतिविधिमा विश्वासयोग्य पात्रका रूपमा सरकारले उनीहरूलाई लिने गरेको छ । राजनीतिक आवश्यकताका अलावा गहिरो धार्मिक ज्ञान, नैतिकतामा विश्वास र महत्वपूर्ण क्षणमा सक्रिय भूमिका निर्वाह गर्न सक्ने खुबी नै केन्द्र सरकारलाई उनीहरूप्रति भरोसा दिलाउने गुण हुन् । 

र, राजनीतिक तालिम दिएर 'मेनल्यान्ड'ले तिब्बतको सुरक्षा व्यवस्था प्रबद्र्धनका लागि उनीहरूलाई उपयोग गर्दै आएको छ । 

उनीहरूलाई जिम्मा लगाइएको प्रमुख राजनीतिक मिसन हो, भविष्यमा शैक्षिक गतिविधिहरूमा महत्वपूर्ण भूमिका निर्वाह गर्ने । त्यसरी मिसन जिम्मा दिइएका भिक्षु र नानीहरूको नाम र संख्या भने सरकारले सार्वजनिक गरेको छैन । 

बेइजिङ मिन्जु विश्वविद्यालयका प्राध्यापक सिओङ कुन्सिङका अनुसार तिब्बतको संस्थापन पक्षलाई बलियो बनाउन बौद्ध मन्दिरहरूले महत्वपूर्ण भूमिका निर्वाह गर्दै आएका छन् । 

भिक्षुहरूमार्फत् नवीनतम धार्मिक र राजनीतिक नीति तथा भावना जागृत गराउन केन्द्र सरकारले सहजकर्ताहरूलाई अगाडि सार्दै आएको छ । र, राष्ट्रपति सी जिनपिङको नयाँ नीति 'चिनियाँ विशेषतासहितको समाजवाद'का साथ समाजवादी विकासको वकालत गर्न भिक्षुहरूलाई अगाडि सारिँदै आएको छ । 

प्राध्यापक सिओङका अनुसार केन्द्र सरकारका नीतिहरू कार्यान्वयनमा तेस्रो पक्षको प्रवचनको तुलनामा भिक्षु र आनीहरूको उपस्थिति बढी प्रभावकारी देखिएको छ । 

तिब्बत दैनिकका अनुसार १८-२४ डिसेम्बर २०१७ मा सम्पन्न चिनियाँ कम्युनिस्ट पार्टीको १९ औं राष्ट्रिय सम्मेलनलगत्तै तिब्बती गाउँहरूमा २० हजारभन्दा बढी कार्यकर्ता परिचालन गरिएको थियो । ती कार्यकर्ताले सात हजार वटा बौद्ध मन्दिरमा पुगेर नयाँ सरकारी नीतिबारे सूचना प्रवाह गरेका थिए । 

तिनै कार्यकर्ताले भिक्षु, आनी, विद्यार्थी र किसानहरूलाई नीति कार्यान्वयनको मुख्य आधारका रूपमा तयार पारेका थिए । 

'तिब्बत राष्ट्रिय सुरक्षाको अग्रभागमा पर्छ र पृथकतावादी संघर्षको जोखिममा पनि छ,' तिब्बत दैनिकले लेखेको छ, 'पार्टीको १९औं राष्ट्रिय सम्मेलनको सन्देश सीमावर्ती इलाकाहरूमा फैलाउनु जरुरी छ, जसबाट राष्ट्रिय सुरक्षाको प्रत्याभूति हुन सक्छ ।' 

 
प्रतिक्रिया दिनुहोस्