मंगलबार, कात्तिक २६, २०७६

समाचार

अछाम–कालिकोट सीमा विवाद प्राविधिक टोलीले टुंग्याउने

लामो समयदेखि कायम रहेको अछाम–कालिकोटको सीमा विवाद दुवैतर्फका प्राविधिक टोलीबाट टुंग्याउने सहमति भएको छ । 

 अछाम–कालिकोट सीमा विवाद प्राविधिक टोलीले टुंग्याउने
कैलाली- लामो समयदेखि कायम रहेको अछाम–कालिकोटको सीमा विवाद दुवैतर्फका प्राविधिक टोलीबाट टुंग्याउने सहमति भएको छ । 

अछामको साविक कालेकाँडा र कालीकोटको साविक लालु गाविसको सीमा विवाद छ । कालिकोटको हुल्ममा दुवै जिल्लाका जिल्ला समन्वय समितिका पदाधिकारी, स्थानीय तह प्रमुख, पार्टी प्रतिनिधिहरू, प्रहरी र प्रशासन प्रमुख, वन, नापी प्रमुखको संयुक्त बैठकबाट उक्त सहमति भएको हो । 

वन र पाखो गरी करिब एक सय रोपनीमा दुवै जिल्लाले दाबी गर्दै आएका छन् । 

अछाममा पुरानो नक्सा नभएकाले कालीकोटमा भएको नक्सा अध्ययन गरेर दुवै जिल्लाका प्राविधिकले तयार पार्ने प्रतिवेदनका आधारमा विवाद समाधान गरिने अछामको विनायक पञ्चदेवल नगरकी उपमेयर अम्बिका चलाउनेले बताइन् । 

अछाममा २०४५ सालमा भएको नापीको नक्सा २०५८ मा भएको माओवादी आक्रमणबाट नष्ट भएको थियो । कालीकोटमा २०५२ सालमा भएको नापीको नक्सा दुवै जिल्लाका प्राविधिकले अध्ययन गर्ने भएका छन् । 

दुई वर्षअघि अछामको नापी टोलीलाई कालिकोटका वासिन्दाले फर्काइदिएका थिए । राष्ट्रिय नक्सामा उक्त क्षेत्र अछाममा पर्छ । 

२०५० सालमा दुवै जिल्लाका सांसद, राजनीतिक दल र प्रशासनबीच विवाद समाधानको सहमति भएको थियो । उक्त क्षेत्रमा बहुमूल्य सालका रुख रहेकाले दुई जिल्लाबीच विवाद भएको हो । 

दुई जिल्लाको सिमाना खोलाले स्पष्ट रूपमा छुट्याएको भए पनि कालिकोटले जबरजस्ती आफ्नो दाबी गरिरहेको कालेकाँडाका स्थानीय कर्णबहादुर बटालाले बताए । उक्त क्षेत्र अछामकै भएको र सोही जंगललाई २०५२ सालमा साल्सैन सामुदायिक वन दर्तासमेत गरिएको उनले जानकारी दिए । 

यसअघि धेरै पटक कालिकोटका वासिन्दा र सामुदायिक वनबीच केही रकम लिएर चरिचरन गर्न दिने निर्णयसमेत भएकाले उक्त क्षेत्र अछामकै भएको उनको भनाइ छ । 
 
प्रतिक्रिया दिनुहोस्