बिहिबार, मंसिर ५, २०७६

अर्थ

६१ प्रतिशत नेपालीमा बैंकिङ पहुँच, मोवाइल बैंकिङ प्रयोगकर्ता पाँच गुणा बढे

नेपालमा बैंकिङ सेवाको पहुँच ६०.९ प्रतिशत जनसंख्यामा पुगेको छ। 

६१ प्रतिशत नेपालीमा बैंकिङ पहुँच, मोवाइल बैंकिङ प्रयोगकर्ता पाँच गुणा बढे
काठमाडौं–  नेपालमा बैंकिङ सेवाको पहुँच ६०.९ प्रतिशत जनसंख्यामा पुगेको छ । 

नेपाल राष्ट्र बैंकले जारी गरेको असोजसान्तसम्म यो आंकडामा सहकारी र लघुवित्त क्षेत्रको पहुँच समावेश गरिएको छैन । 

त्यसैगरी तीन वर्षको अवधिमा मोवाइल बैकिङ प्रयोगकर्ताको संख्या पाँच गुणाले बृद्धि भएको छ । राष्ट्र बैंकका अनुसार २०७३ मा १७ लाख ५५ हजार मानिसले मोवाइल बैकिङ सेवा प्रयोग गर्थे भने २०७६ सम्म आइपुग्दा यो संख्या ८३ लाख ४७ हजर पुगेको छ । 

यस अवधिमा इन्टरनेट बैकिङ प्रयोगकर्ताको संख्या पनि चार लाखले बढेको छ । २०७३ मा इन्टरनेट बैकिङ प्रयोगकर्ता पाँच लाखमात्र रहेकोमा २०७६ असोजसम्म यो संख्या ९ लाख पुगेको छ ।  

अन्य सेवाहरुको प्रयोगकर्ता बढे पनि शाखारहित बैंकिङ केन्द्रका सेवाग्राहीको संख्या भने घटिरहेको छ। २०७३ मा विभिन्न बैंकहरुका ८१२ वटा शाखारहित बैकिङ सेवाका सेवाग्राहीको संख्या २ लाख १३ हजार थियो भने २०७६ असोजसम्म  शाखा केन्द्र बढेर १५३० पुग्दा यसका सेवाग्राही जम्मा १ लाख ६८ हजार मात्र रहेको नेपाल राष्ट्र बैंकले जनाएको छ । 

त्यस्तै ६३९ स्थानीय तहमा विभिन्न वाणिज्य बैंकहरुले शाखा विस्तार गरेका छन् । १४ वटा स्थानीय तहमा अझै पनि वाणिज्य बैंक पुगिसकेका छैनन् । 

२०७६ असोज मसान्तसम्ममा सुदुरपश्चिमका ६ स्थानीय तह, प्रदेश १ र गन्डकी प्रदेशका एक एक स्थानीय तहमा वाणिज्य बैंक पुग्न सकेका छैनन् । त्यस्तै कर्णाली प्रदेश, प्रदेश २ र प्रदेश ३ का दुई दुई स्थानीय तहमा अझै कुनै पनि बैंकका कार्यालय छैनन् । 

दुर्गमका आर्थिक कारोबार निकै कम हुने यी स्थानीय तहमा बैंकहरुले शाखा खोल्न मानिरहेका छैनन् । 

नेपाल राष्ट्र बैंकले २०७६ असार मसान्तसम्ममा नेपाल भर रहेका ७५३ स्थानीय तहमा वाणिज्य बैंकको शाखा पु¥याउनका लागि वाणिज्य बैंकहरुलाई निर्देशन दिएको थियो । 

त्यस्तै बैंक तथा वित्तीय संस्थाबाट कर्जा लिनेहरुको संख्या पनि एक वर्षमा एक लाखले बढेको छ। 

२०७५ असारसम्ममा १३ लाख १ हजार जनाले कर्जा लिएकोमा २०७६ असार मसान्तसम्ममा यो संख्या १४ लाख पुगेको छ । 

त्यस्तै सबै वाणिज्य बैंकहरुमा गरी निक्षेप खाताको संख्या २ करोड ७८ लाख ६७ हजार पुगेको छ । गत असार मसान्तमा यो संख्या २ करोड ३५ लाख ४५ हजार थियो । 

राष्ट्र बैंकका सहायक प्रवक्ता गोविन्द नागिला भन्छन्, “नेपालमा वित्तीय पहुँच तीव्र रुपमा बढ्दै गएको प्रमाण हो यो ।”
प्रतिक्रिया दिनुहोस्