बिहिबार, मंसिर ५, २०७६

समाचार

चितुवाको आक्रमणबाट बालकको मृत्यु

तनहुँको भानु नगरपालिका-२ फुस्रेटारमा चितुवाको आक्रमणबाट बालकको ज्यान गएको छ।

चितुवाको आक्रमणबाट बालकको मृत्यु
तनहुँ- जिल्लाको भानु नगरपालिका-२ फुस्रेटारमा चितुवाको आक्रमणबाट बालकको ज्यान गएको छ। ज्यान गुमाउनेमा सोही ठाउँ बस्ने सात वर्षीय ऋतिक रोका छन्।

घरकै आँगनमा खेलिरहेका बेला चितुवाको आक्रमणमा परी सोमबार राति बालकको ज्यान गएको जिल्ला प्रहरी कार्यालयका प्रहरी नायब उपरीक्षक लीलाराज लामिछानेले जानकारी दिए। चितुवाले बालकको कम्मरमुनिको आधा भाग खाएको थियो। बालकको शव घरभन्दा १०० मिटरमाथिको जंगलमा भेटिएको थियो।

मजदुरी गर्दै आएका मृतकका बुबा राजु पाँच÷छ वर्षदेखि बेपत्ता भएको सोही नगरपालिकाका वडाअध्यक्ष अर्जुनबहादुर केसीले जानकारी दिए। “घरमा कोही पनि नभएको अवस्थामा चितुवाले बालकलाई आक्रमण गरेर लगेको हुनसक्छ,” उनले भने, “बालक घरमा नभेटिएपछि खोजतलास गर्दा मृतावस्थामा फेला परेका थिए।”

सोमबार बिहान मात्रै सोही नगरपालिका–३ स्थित एक सामुदायिक वनमा थापिएको खोरमा परेर एक चितुवा नियन्त्रणमा आएको थियो। चितुवाको आक्रमणबाट वडा नं १, २, ३ र ४ मा डेढ वर्षको अवधिमा ६ बालबालिकाको मृत्यु भइसकेको छ।
प्रतिक्रिया दिनुहोस्