मंगलबार, मंसिर ३, २०७६

समाचार

भारतमा दाजुभाइ सहित तीन नेपालीको हत्या

भारतको पिथौरागढमा तीन जना नेपाली मजदुरको हत्या भएको छ। 

भारतमा दाजुभाइ सहित तीन नेपालीको हत्या
धनगढी- भारतको पिथौरागढमा तीन जना नेपाली मजदुरको हत्या भएको छ। 

बैतडीको पुरचौँडी नगरपालिका-५ दहतालीका ३६ वर्षीय हरे बोहरा, २७ वर्षीय बीरा बोहरा र सोही ठाउँ वडा नम्बर ४ भटना तडिखेतका ३६ वर्षीय काशी बोहराको हत्या भएको हो । 

उनीहरुको कार्तिक ८ गते हत्या भए पनि आईतबार मात्रै जानकारी भएको जिल्ला समन्वय समितिका उपप्रमुख धनबहादुर बोहराले बताए। 

उनीहरुको धारिलो हतियारले रेटेर हत्या गरिएको खबर प्राप्त भएको उनले बताए। उनका अनुसार हरे बोहरा र बीरा बोहरा सहदोर दाजुभाइ हुन्। 

उनीहरु पिथौरगढको सिलौल मड भन्ने ठाउँमा गएको डेढ बर्ष यतादेखि मजदुरी गर्दै आएका थिए । 

मृतकहरुको शव पिथौरागढ जिल्ला अस्पतालमा राखिएको छ। 

केही महिना अघि मात्रै दाजुभाउजुलाई भेट्न पिथौरागढ गएका बीरा बोहरा पनि उतै मजदुरी गर्न थालेका थिए । 

कसले किन हत्या गर्‍यो भन्ने खुल्न नसके पनि हरे बोहराकी श्रीमती किर्रा फरार रहेकाले सो घटनामा उनको संलग्नता हुन सक्ने आशंका गरिएको छ।

घटनाबारे भारतीय प्रहरीले अनुसन्धान गरिरहेको छ । 
प्रतिक्रिया दिनुहोस्