मंगलबार, कात्तिक २६, २०७६

समाचार

कुमार पौडेल 'भिडन्त होइन फेक इन्काउन्टर'मा मारिए

राष्ट्रिय मानव अधिकार आयोगले नेत्रविक्रम चन्द विप्लव समूहका सर्लाही जिल्ला इन्चार्ज कुमार पौडेल दोहोरो भिडन्तमा नमारिएको बताएको छ।

कुमार पौडेल 'भिडन्त होइन फेक इन्काउन्टर'मा मारिए
काठमाडौं- राष्ट्रिय मानव अधिकार आयोगले नेत्रविक्रम चन्द विप्लव समूहका सर्लाही जिल्ला इन्चार्ज कुमार पौडेल दोहोरो भिडन्तमा नमारिएको बताएको छ।

आयोगले आफ्नो अनुन्धानबाट पौडेल दोहोरो भिडन्तमा मारिएको भन्ने गलत भएको पुष्टि भएको जनाएको छ। आयोगको सोमबार बसेको बैठकले यस्तो ठम्याई गरेको प्रवक्ता एवम् सचिव वेद भट्टराईले जनाएका छन्।

आयोगले घटनामा प्रत्यक्ष संलग्न प्रहरी र उक्त टोलीको नेतृत्व गरेका प्रहरी अधिकारीविरूद्ध मुद्दा चलाउन सरकारलाई निर्देशन दिने निर्णयसमेत गरेको आयोगले जनाएको छ।

आयोगका पदाधिकारीहरूको सोमबार बसेको बैठकले आफ्नो अनुसन्धान टोलीको स्थलगत छानबिन प्रतिवेदनका आधारमा घटनामा प्रत्यक्ष रूपमा संलग्न तथा कमान्डरसमेत रहेका प्रहरी निरीक्षक कृष्णदेवप्रसाद साह, प्रहरी हवल्दारद्वय श्रीविनोद साह र सत्यनारायण मिश्रलाई तत्काल निलम्बन गरी फौजदारी अभियोगमा मुद्दा चलाउन सरकारलाई सिफारिस गरेको हो।

आयोगका सचिव वेद भट्टराईद्वारा सोमबार जारी विज्ञप्तिका अनुसार प्रहरी निरीक्षक किरणप्रसाद न्यौपाने र प्रहरी नायब निरीक्षक सूर्यकुमार कार्कीलाई घटनाको मुचुल्का गर्दा त्रुटिपूर्ण तवरले कार्य गरेकाले सचेत गराउन सरकार र नेपाल प्रहरीलाई सिफारिस गरिएको छ।

आयोगले प्रहरीलाई निर्देशन दिने तालुक निकायका पदाधिकारी तथा कर्मचारीहरू, आदेश दिने अधिकारी तथा दुरुत्साहन गर्ने व्यक्तिमाथि समेत अनुसन्धान गरी कानुनी दायरामा ल्याई कानुनबमोजिम कारबाही गर्न सिफारिस गरेको छ। पौडेलको शव परीक्षणक्रममा न्यूनतम प्रक्रियासमेत पूरा नगरेकामा जिल्ला अस्पताल सर्लाहीका तत्कालीन डा. वीरेन्द्रकुमार मण्डललाई सचेत गराउन आयोगले सिफारिस गरेको छ।

असार पहिलो साता पौडेल सर्लाहीको लालबन्दी नगरपालिकास्थित जंगलमा भएको भनिएको भिडन्तमा मारिएको प्रहरीको दाबी थियो। प्रहरीले गैरन्यायिक हत्या गरेको भन्दै संसदमा समेत कुरा उठेको थियो।
प्रतिक्रिया दिनुहोस्