मंगलबार, मंसिर ३, २०७६

समाचार

गोली हानेर प्रहरीले समायो जनकपुरबाट चोर 

प्रहरीले गोली चलाएर एकाबिहानै जनकपुरबाट चोरको गिरोहलाई पक्राउ गरेको छ । जनकपुरधाम उपमहानगरपालिकाको मुलगेट नजिकै ...

गोली हानेर प्रहरीले समायो जनकपुरबाट चोर 
जनकपुरधाम- प्रहरीले गोली चलाएर एकाबिहानै जनकपुरबाट चोरको गिरोहलाई पक्राउ गरेको छ ।

जनकपुरधाम उपमहानगरपालिकाको मुलगेट नजिकै एक पसलको सटर फुटाएर चोरी गर्ने चारजनालाई प्रहरीले पक्राउ गरेको हो ।

पक्राउ पर्नेमा रौतहट घरभइ जनकपुरधाम–४ बस्ने ५५ वर्षीय विनोद सिंह, रौतहटकै वृन्दावन नगरपालिका-१ रमौली बस्ने ३५ वर्षीय गगनदेव पटेल, भारत विहार सीतामढी जिल्ला वैरगनीयाका ३९ वर्षीय ओजिर अन्सारी र सीतामढी रिगास्थित पिपराढी घरभइ जनकपुरधाम–४ बस्ने ४० वर्षीय इलियास राइन रहेको प्रहरीले जनाएको छ ।

उपमहानगरपालिका कार्यालय नजिकै रहेको एक फर्निसिङ पसलमा सटरको ताल्चा फुटाइरहेको देखेपछि प्रहरीले हवाइ फायर गरेर उनीहरुलाई पक्राउ गर्न खोजेको थियो ।

तर उनीहरु मध्ये तीनजनाले प्रहरीलाई लक्षित गरी कटुवा पेस्तोल तानेपछि प्रहरीले जबाफी कारबाहीमा तीन राउण्ड गोली चलायो । प्रहरीको गोली लागेर एकजना चोर घाइते भएको धनुषाका प्रहरी उपरीक्षक शेखर खनालले जानकारी दिए ।

घाइते हुनेमा रौतहट गौरका विनोद सिंह रहेका छन् । दुबै खुट्टमा गोली लागेको सिंहको जनकपुर अञ्चल अस्पतालमा उपचार भइरहेको प्रहरीले जनाएको छ ।
प्रतिक्रिया दिनुहोस्