बुधबार, कात्तिक २७, २०७६

समाचार

असुरक्षित बने लोपोन्मुख हाइना

जिल्लामा पछिल्लो समय लोपोन्मुख जनावर हाइना (हुडार) असुरक्षित बन्न थालेका छन् ।

असुरक्षित बने लोपोन्मुख हाइना
सल्यान- जिल्लामा पछिल्लो समय लोपोन्मुख जनावर हाइना (हुडार) असुरक्षित बन्न थालेका छन् । बितेका तीन महिनामा घाइते अवस्थामा फेला परेका तीन हाइनामध्ये दुई उपचारका क्रममा मरेका छन् । 
    
बुधबार छत्रेश्वरी गाउँपालिका-६, भोटेचौरमा ढाड भाँचिएको अवस्थामा स्थानीयले फेला पारेका हाइनालाई उद्धार गरेर बाँके राष्ट्रिय निकुञ्जमा पठाइएको छ । यसअघि पनि घाइते अवस्थामा फेला परेका दुई हाइना डिभिजन वन कार्यालयमा उपचारका क्रममै मरेका थिए । स्थानीय भाषामा गधेबाघको नाममा परिचित हाइनालाई मानिसले विभिन्न स्थानमा पासो थाप्ने गरेकाले पासोमा परेर घाइते भएको हुनसक्ने डिभिजन वन कार्यालयका प्रमुख थिरबहादुर कार्कीले जानकारी दिए । 

‘जङ्गली जनवारबाट बच्न घर वरिपरि पासो थाप्ने र त्यसमा अल्झेर हाइना परेको हुनसक्छ,’ प्रमुख कार्कीले भने, ‘हुडार लगायतका जनावरले सडक पार गर्दा पनि तीव्र गतिमा रहेका सवारीसाधनले ठक्कर दिएर पनि घाइते भएका हुनसक्छन्, जिल्लाका अधिकांश सडकबाट जंगली जनावर वारपार गर्ने भएकाले पनि धेरै खतरामा परेका छन् ।’ 

हुँडार भनेर पनि चिनिने हाइना नेपालको संरक्षित र लोपोन्मुख जनावरमा पर्छ । वन कार्यालयका अनुसार नेपालको दाङ र सल्यानमा पाइने हाइना सीमित संख्यामा छन् । नेपाललगायत अफ्रिका तथा एसियाको जंगलमा हाइना पाइन्छ । तर, अन्य देशको भन्दा नेपालको हाइना सुन्दर देखिने डिभिजन वन प्रमुख कार्कीले बताए । डिभिजन कार्यालयका अनुसार नेपालमा हाइना २०० भन्दा बढी संख्यामा छैनन् ।  

मरेको जनावरको सिनो खाने हाइना अर्थात् हुडारले पछिल्लो समय बस्तीमा छिरेर कुखुराको खोर भत्काएर कुखुरालाई पनि खाने गरेको स्थानीय बताउँछन् । कुखुरा खान गाउँमा पसेका हुडारलाई विष राखेर मार्ने गरेकाले हाइना संकटमा परेको डिभिजन कार्यालयले जनाएको छ ।
प्रतिक्रिया दिनुहोस्