सोमबार, मंसिर २३, २०७६

समाचार

मोरङमा बढ्दै छ महिला हत्या, प्रहरी अनुसन्धानमै सीमित

उत्तरी मोरङमा पछिल्ला तीन महिनामा तीन महिलाको हत्या भएको छ । बेलबारीकी शर्मिला राईको हत्या भएको प्रमाणित भएको छ । शर्मिला राई र रिना बस्नेतको शंकाशस्पद मृत्यु पनि हत्या नै भएको स्थानीयको दाबी छ । 

मोरङमा बढ्दै छ महिला हत्या, प्रहरी अनुसन्धानमै सीमित
घटना नम्बर १ : 

बेलबारी नगरपालिका-४ की रमिला राई गत फागुन १७ गते हराइन् । २६ वर्षीया राईको हत्या भएको आशंका भयो । हत्या आरोपमा फागुन २३ गते  इलामबाट स्थानीय नेकपा नेता योगेन्द्र गुरुङ पक्राउ परे । बयानमा गुरुङले हत्या स्वीकारे । हाल उनी पुर्पक्षका लागि थुनामा छन् । 

घटना नम्बर २ : 

बेलबारी ६ की मुना राई नामले चिनिने शर्मिला राईको वैशाख ५ गते बिहीबार मृत्यु भयो । धरानको बिपी कोइराला स्वाथ्य विज्ञान प्रतिष्ठानमा उपचार गर्दागर्दै भएको भनिएको मृत्युलाई आफन्तले अस्वीकार गर्दै छानबिन माग गरेका छन् ।

मृतकका पति पर्वत राईले माइती पक्षलाई उपचारका क्रममा लानेबित्तिकै मृत्यु भएको भनेको तर पोस्टमोर्टम गर्नुअगाडिको एक तस्बिरमा चोटैचोट र रगत देखिएपछि आफन्तले मृत्यु नभएर हत्याको आशंका गरेका छन् । पोस्टमर्टमा आफन्त बोलाएपछि पुगेकी फुपू पूर्णा राईले तस्बिर लिएकी थिइन् ।

तस्बिरमा राईको घाँटीमा चोट देखिन्छ, छातीमा रगत र पेटमा नीलडाम देखिन्छ । यही तस्बिरका  कारण आफन्तले हत्या भएको आशंका गर्दै बेलबारी प्रहरी कार्यालयमा जाहेरी हालेका छन् ।

घटना नम्बर ३ :

वैशाख ७ गते पथरीमा अर्को महिलाको शव नग्न अवस्थामा भेटियो । स्थानीय वीरबहादुर बस्नेतको घरमा डेरा लिएर बस्ने रुपा भनिने रिना बस्नेतको हत्या भएको आशंका छ ।

वैदेशिक रोजगारीमा रहेका पति सन्तोष बस्नेतकी पति रिना आफ्ना १३ वर्षे छोरा साइमनसँगै बस्थिन् । छोरासँग राति पथरीको प्रस्तावित रंगशाला क्षेत्रमा भएको कन्सर्ट हेरेर ११ बजेपछि डेरामा आएकी २९ वर्षीया रिनाको स्वाभाविक मृत्यु नभएर हत्या भएको स्थानीयको भनाइ छ । 

यसरी उत्तरी मोरङमा पछिल्ला तीन महिनामा तीन महिलाको हत्या भएको छ । बेलबारीकी शर्मिला राईको हत्या भएको प्रमाणित भएको छ । शर्मिला राई र रिना बस्नेतको शंकाशस्पद मृत्यु पनि हत्या नै भएको स्थानीयको दाबी छ । 

विरोधमा स्थानीय र आफन्त आन्दोलित

रिना हत्याको विरोधमा पथरीमा स्थानीय आन्दोलित भएका छन् ।  सोमबार सडकमा आएका स्थानीयले केही समय पूर्वपश्चिम राजमार्गको सडक अवरुद्ध गरेका थिए । पथरीका स्थानीय कमल मादेनले पथरीमा सुरक्षाकर्मीको राम्रो उपस्थिति भए पनि हत्यारा पत्ता लाग्न नसकेकाले आन्दोलन गरिएको बताए । उनले भने, 'रिना बस्नेतको मात्रै हैन यस अगाडि एउटा गोरखा गल्लीमा फागुन १६ गते एउटा युवकको शव भेटियो । प्रशासनले न सुरक्षा दिन्छ न हत्यारा पत्ता लाउँछ ?' 

यता बेलबारीकी शर्मिला राईका आफन्तले पनि शंकास्पद मृत्युको न्यायिक छानबिन नभएमा आन्दोलन गर्ने बताएका छन् । मृतककी फुपू पूर्णा राईले  चोटैचोट र रगत देखिएको घटनालाई पनि सामान्य लिएमा आन्दोलन गर्ने बताइन् ।
 
अनुसन्धान गरिरहेका छौं : प्रहरी

रिना बस्नेत र शर्मिला राईको शंकास्पद र विभत्स मृत्युको विषयमा प्रहरीले अनुसन्धान गरिरहेको बताएको छ । इलाका प्रहरी कार्यालय बेलबारीका प्रहरी निरीक्षक रामकुमार राईले शर्मिला राईको पोस्टमार्टम रिपोर्टपछि अन्य अनुसन्धान गर्ने बताए । उनले भने, 'पोस्ट मार्टम रिपोर्ट आएपछि त्यसैअनुसार अनुसन्धान गर्छौं ।'

यता, रिना बस्नेतको हत्या आशंकाका विषयमा कुराकानी गर्न सम्पर्क गर्दा इलाका प्रहरी कार्यालय पथरीका प्रहरी निरीक्षक कमल बजगाईंले फोन उठाएनन् । मोरङका प्रहरी प्रमुख एसपी मनोज केसीले भने रिनाको कल डिटेल्स लिने र बाँकी अनुसन्धान भइरहेको मिडियालाइ बताएका छन् । 

 
प्रतिक्रिया दिनुहोस्