काठमाडौं-बंगलादेशमा जारी एसीसी यू-१९ एसिया कपमा सुमह चरणको अन्तिम खेलमा रोहितकुमार पौडेलले उत्कृष्ट ब्याटिङसँगै नेपालले युएईलाई ३ विकेटले पराजित गरेको छ । यसअघिका दुबै खेल गुमाएको नेपालले आफ्नो अन्तिम खेलमा सान्तोना जित निकालेको हो ।
युएईले दिएको २ सय ६९ रनको लक्ष्य नेपालले ४९ ओभर १ बलमा ७ विकेट गुमाउदै २ सय ७५ रन बनाउदैँ लक्ष्य पुरा गरेको हो । नेपालको जीतमा रोहित नायक सावित भए । रोहितले ८८ बलमा ६ चौका र ३ छक्का प्रहार गर्दै ९२ रन बनाएपछि नेपालको जित संभव भएको हो ।
सुरुमा धैर्यताका साथ ब्याटिङ गरेका रोहितले अन्तिम ५ ओभरमा विस्फोटक ब्याटिङ गर्दै नेपालको जित संभव बनाएका हुन् । रोहित ४९ औँ ओभरको अन्तिम बलमा रन आउटको शिकार हुन पुगे । त्यस्तै छक्का हान्दै नेपाललाई जिताएका रसिद खानले १४ बलमा ३ छक्का प्रहार गर्दै २७ रन को आक्रमक पारी खेल्दै जीतको स्वाद चखाए ।
त्यस्तै सन्दीप जोराले ६७, कप्तान आरिफ शेख ३५ र रित गौतमले १८ रन बनाउन बाहेक अन्य कुनै पनि ब्याटम्यानले सम्झन योग्य प्रर्दशन गर्न सकेनन् । युएईका लागि आर्यन लेकरा र एरोन बेन्जामिनले समान २-२ विकेट लिए ।
यसअघि युएईका लागि कप्तान फाहद नवाजले ८३ रन जोड्दा अंश टन्डनले ६७ रनको अर्धशतकीय पारी खेले । दुवैले पहिलो विकेटका लागि १५९ रनको साझेदारी गरेका थिए । नेपालका नन्दन यादव, राशिद खान र पवन सर्राफले समान २-२ विकेट लिए ।
नेपाल यस अघि भारतसँग १ सय ७१ रनको फराकिलो अन्तर र अफगानिस्तानसँग ३ विकेटले पराजित भएको थियो । अन्तिम खेलमा युएईलाई ३ विकेटले पराजित गर्दै एसिया कप सुखद अन्त्य गरेको छ ।
प्रकाशित: Dec 31, 2017| 18:23 आइतबार, पुस १६, २०७४