काठमाडौं- कञ्चनपुरको भीमदत्त-१९ की १३ वर्षीया किशोरी निर्मला पन्तको हत्या अनुसन्धान थप जटिल बन्दै गएको छ । ११ साउनमा मृत अवस्थामा फेला परेकी उनको बलात्कारपछि हत्या भएको विषयमा प्रहरीले अनुसन्धान गरिरहका अभियुक्तहरूको डीएनए 'नेगेटिभ' पाइएपछि अनुसन्धानमा अन्योल बढेको हो ।
प्रहरीले मुख्य अभियुक्तका रूपमा नियन्त्रणमा लिई अनुसन्धान थालेका स्थानीय दिलिपसिंह बिष्टको डीएनए नमिलेपछि प्रहरीको अनुसन्धान माथि नै प्रश्न उठेको थियो । स्थानीय बासिन्दाको चर्को दबाबपछि नेपाल प्रहरीले तत्कालीन कञ्चनपुर प्रहरी प्रमुख एसपी डिल्ली बिष्ट, उनका छोरा किरण र भीमदत्त नगरपालिकाका मेयर सुरेन्द्र बिष्टका भतिजा आयुषको डीएनए परीक्षण गरेको थियो ।
प्रहरीका एक उच्च अधिकारीका अनुसार पछिल्लो समय डीएनए परीक्षण गरिएका निलम्बित एसपी बिष्ट, उनका छोरा किरण र मेयरका भतिजा आयुषको डीएनए परीक्षण अनुसन्धानको आवश्यकताभन्दा पनि स्थानीय बासिन्दाको दबाबमा गरिएको हो । प्रहरी अधिकारीको यो भनाइले पनि प्रहरी अनुसन्धानको गहिराइमाथि शंका उब्जेको छ ।
नेपाल प्रहरीले भने अनुसन्धान निरन्तर अगाडि बढेकाले अभियुक्तसम्म पुगेरै छाडने दाबी गरेको छ । अहिले नै अनुसन्धान अन्योलमा परेको बताउन नमिल्ने प्रहरी प्रवक्ता शैलेश थापा क्षत्रीले बताए । 'प्रारम्भिक अनुसन्धानबाट आशंका गरिएका केही व्यक्तिमाथि डीएनए परीक्षण गरेका हौं । त्यो नमिल्दा अनुसन्धान नै शून्यमा जाँदैन,' एसएसपी क्षत्रीले भने, 'यो अनुसन्धानको एउटा अंश मात्र हो । हरेक कोणबाट अनुसन्धान गरिरहेका छौं, जसबाट प्रहरी अपराधीसम्म पुग्नेमा विश्वस्त छौं ।'
के हो डीएनए ?
डिओक्सिराइबो न्युक्लिक एसिडको छोटकरी नाम नै डीएनए हो, जुन हरेक जीवमा फरक-फरक हुन्छ । यही फरक न्युक्लियसका आधारमा व्यक्तिको पहिचान गर्ने विधि नै डीएनए परीक्षण हो ।
सही नमूना लिएमा डीएनए परीक्षणबाट शतप्रतिशत परिणाम प्राप्त हुने प्रहरी अधिकारीहरूको भनाइ छ । सन् १९८० को दशकमा पहिचान भएको योे प्रविधी नेपालमा भने धेरै पछाडि मात्र प्रयोगमा आएको हो । डीएनएको परीक्षण नेपाल प्रहरीको विधि विज्ञान प्रयोगशालाबाट गरिँदै आएको छ ।
प्रकाशित: Dec 31, 2017| 18:23 आइतबार, पुस १६, २०७४